६ सय ६२ सहसचिवको समायोजन

काठमाडौं- सरकारले ६ सय ६२ सहसचिवको समायोजन गरेको छ। संघीय मामिला तथा सामान्य प्रशासन मन्त्रालयका प्रवक्ता सुरेश अधिकारीले ‘कर्मचारी समायोजन अध्यादेश–२०७५’ अनुसार अनलाइन फाराम भरेका आधारमा ६६२ सहसचिवलाई समायोजन गरिएको बताए। उनले ती सहसचिवको मन्त्रिपरिषद्ले स्वीकृत गरेपछि समायोजन गरिएको बताए।

उनका अनुसार आवेदन दिएको आधारमा स्घमा ५६० र प्रदेशमा १०२ सहसचिवको समायोजन गरिएको हो। यसअघि सरकारले सचिव र ८४८ उपसचिवको समायोजन गरिसकेको छ। समायोजन गरिएका सहसचिवको समायोजनको पत्र तयार भइरहेको छ।

सरकारले संघ, प्रदेश र स्थानीय तहमा समायोजनका लागि गत पुस ११ गतेदेखि यही माघ २ गतेसम्म अनलाइन फाराम भर्न समयसीमा तोकेको थियो। उपसचिवको समायोजन सकिएपछि शाखा अधिकृतदेखि तल्लो तहका कर्मचारीलाई समायोजन गरिने मन्त्रालयका सचिव दिनेशकुमार थपलियाले बताए।

सरकारले आगामी फागुन ३ गतेसम्म अनलाइन आवेदनका आधारमा सबै कर्मचारीको समायोजन गरिसक्ने लक्ष्य लिएको छ। सरकारले संघमा ४७ हजार ९२०, प्रदेशमा २२ हजार ७५५ र स्थानीय तहमा ६७ हजार ५०३ कर्मचारी समायोजन गर्दैछ।