काठमाण्डु-टी–२० शृङ्खलाको पहिलो खेलमा घरेलु टोली वेस्ट इन्डिजले दक्षिण अफ्रिकालाई ७ विकेटले पराजित गरेको छ । दक्षिण अफ्रिकाले प्रस्तुत गरेको १ सय ७५ रनको लक्ष्य वेस्ट इन्डिजले मात्र ३ विकेटको क्षतिमा १३ बल अगावै पछ्यायो ।

लक्ष्य पछ्याउने क्रममा वेस्ट इन्डिजलाई ओपनरद्वय अलिक अथानाजे र साई होपले उत्कृष्ट सुरुवात दिलाए । दुवैले पहिलो विकेटका लागि ८४ रनको साझेदारी गरे ।

दक्षिण अफ्रिकाका लागि ओटनिल बार्टम्यानले ४ ओभर बलिङ गर्दै ३० रन खर्चेर २ विकेट लिए । क्वेना माफाकाले १ विकेट हात पारे ।

त्यसअघि ट्रिस्टन स्टब्सको अर्धशतकीय इनिङ्सको मद्दतले दक्षिण अफ्रिकाले निर्धारित २० ओभरमा ७ विकेटको क्षतिमा १ सय ७४ रन बनाएको थियो ।

वेस्ट इन्डिजका लागि माथ्यु फोर्डेले ३ विकेट लिए भने समार जोसेफले २ तथा अकिल होसेन र रोमारियो सेफर्डले १–१ विकेट हात पारे । तीन खेलको शृङ्खलाको दोस्रो खेल सोमबार हुनेछ । यसअघि दुई खेलको टेस्ट शृङ्खला भने दक्षिण अफ्रिकाले १–० ले जितेको थियो ।