पश्चिम एशियाको तनावबारे ओलीको चासो : त्यहाँ १२ लाख नेपाली छन्, चनाखो हुनुपर्छ

काठमाण्डु – नेकपा एमाले अध्यक्ष केपी शर्मा ओलीले पश्चिम एशियाको पछिल्लो तनावग्रस्त राजनीतिक परिस्थितिप्रति चासो व्यक्त गरेका छन् ।

नेकपा एमालेको परराष्ट्र मामिला विभागले आज आयोजना गरेको ‘पश्चिम एशियामा बदलिँदो शक्ति समीकरण र विश्व भूराजनीतिमा त्यसको प्रभाव’ विषयक अन्तर्क्रियालाई सम्बोधन गर्दै ओलीले चासो व्यक्त गरे ।

पछिल्लो समय पश्चिम एशियाको राजनीतिमा विभिन्न खाले उचारचढाव भइरहेको अवस्थाप्रति संकेत गर्दै ओलीले अरु देशबारे छलफल र विश्लेषण गर्दा नेपालले अपनाउनुपर्ने कूटनीति र रणनीतिबारे पनि सन्तुलित हुनुुपर्नेमा जोड दिए ।

‘मुख्य गरेर पश्चिम एशियाका विभिन्न देशमा रोजगारीका लागि १२ लाखभन्दा नेपाली पुगेका छन्,’ उनले भने, ‘त्यहाँ युद्ध भयो भने उनीहरूको रोजगारी मात्रै खोसिँदैन । उनीहरूको सुरक्षाको कुरा पनि महत्त्वपूर्ण हुन्छ । यी विषयमा नेपाल सबैभन्दा चनाखो रहनुपर्छ र त्यसका लागि तयारी अवस्थामा बस्नुपर्छ ।’

उनले पश्चिम एशियाली क्षेत्रमा युद्ध सुरु भयो भने भने त्यतिधेरै नेपालीलाई तुरुन्त नेपाल फर्काउने स्रोतसाधनको समेत अभाव हुने भन्दै त्यसका लागि पनि सोच्नुपर्ने बताए । उनले त्यसका लागि सरकारले तयारी थाल्नुपर्नेमा जोड दिए ।

अध्यक्ष ओलीले पश्चिम एशियाका विभिन्न देशमा रोजगारीका लागि गएका युवाहरूको रेमिट्यान्सबाट नेपालको अर्थतन्त्र चलायमान भएको उल्लेख गर्दै त्यहाँको पछिल्लो अस्थिर अवस्थाले नकरात्मक प्रभाव पारेको अवस्थामा नेपालको अर्थतन्त्र समेत धरापमा पर्न सक्ने उल्लेख गरे । ‘त्यस्तो चुनौतिपूर्ण अवस्थाको आकलन गर्दै नेपालले कम्तीमा पनि आफ्नो देशका जनताका लागि पर्याप्त खाद्यान्न उत्पादन गरी उपयोग गर्ने अवस्था बनाउने गरी कृषि क्षेत्रलाई प्राथमिकतामा राखेर अघि बढ्नुपर्छ,’ उनले भने, ‘त्यसका लागि कृषि उत्पादनमा जोड दिनुपर्छ । कुनै पनि बेला हाम्रो देशका नागरिकलाई फिर्ता ल्याउनुपर्ने अवस्था आउनसक्छ । त्यसका लागि हामी सबैले कृषि उत्पादनमा जोड दिनुको विकल्प छैन ।’

अध्यक्ष ओलीले गलतलाई गलत र राम्रोलाई राम्रो भन्ने कूटनीति अवलम्बन गर्नुपर्नेमा जोड दिए ।

कार्यक्रममा पूर्व राजदूत डा. नारद भारद्वाजले कार्यपत्र प्रस्तुत गरेका थिए । उनले कार्यपत्र प्रस्तुत गर्दै पश्चिम एशियाको पछिल्लो राजनीतिमा विभिन्न खाले उचारचढाव भइरहेको स्मरण गराएका थिए । उनले हमासले इजरायलमा आक्रमण गरेयता सुरु भएको युद्धले समग्र मध्यपूर्व क्षेत्रमा एकपछि अर्को गर्दै विभिन्न खालका नयाँ–नयाँ परिवर्तनहरू देखा पर्न थालेको उल्लेख गरेका थिए ।

अमेरिकाले इराक र सिरियामाथि गरेको आक्रमण, पाकिस्तानमा इरानले गरेको आक्रमण र त्यसको बदलामा पाकिस्तानले इरानमा गरेको आक्रमणका उदाहरण भएको उनले उल्लेख गरेका थिए । गत हप्ता मात्रै जोर्डनमा अमेरिकी सैनिक शिविरमा भएको आक्रमण र त्यसको प्रतिकार स्वरूप अमेरिकाले गरेको आक्रमण जस्ता घटनाले पनि पश्चिम एशियाको राजनीतिमा उतारचढाव देखिएको उल्लेख गरे । यमनमा रहेका हुथी समहुले बन्दरगाहमा आएका अन्तर्राष्ट्रिय जहाजमा गरेको आक्रमणपछि बेलायत र अमेरिका लगायतका देशले त्यहाँ पुनः गरेको आक्रमण जस्ता सन्दर्भ पनि कार्यपत्र प्रस्तुतका क्रममा उल्लेख गरेका थिए ।

कार्यक्रमा नेकपा एमाले महासचिव शंकर पोखरेलको पनि उपस्थिति रहेको थियो । कार्यक्रममा उपमहासचिव विष्णु रिमाल, स्थायी कमिटी सदस्य एवं परराष्ट्र मामिला विभाग प्रमुख डा. राजन भट्टराई, सचिव डा. अञ्जान शाक्य लगायतले पनि आ–आफ्ना धारणा प्रस्तुत गरेका थिए ।