ब्रेकिंग न्युज सुरक्षा

सेनापति थापाको १ वर्ष : विकृति फैलाउनेको भागाभाग, आर्थिक अनुशासनमा जोड (भाग–२)

काठमाडौं –  नेपाली सेनाका प्रधानसेनापति पूर्णचन्द्र थापाले आफ्नो कार्यकालको पहिलो वर्ष सेनामा सुधारका लागि थुप्रै प्रयास गरे । विकृति हटाउन र समस्या निराकरण गर्न नीति, निर्देशिका र निर्देशन दिए ।

dish home

सेनापति थापाले सेनाभित्र सुधारका लागि निरोधात्मक प्रयासले मात्रै पुगेन, उपचारात्मक विधि समेत अपनाउनु प¥यो । विकृतिमा संलग्न सैनिक अधिकार र सदस्यलाई कारवाही समेत गर्नुप¥यो ।

सेनाभित्र हुने सबैभन्दा पुरानो र ठूलो विकृति हो – सैनिक भर्ना प्रक्रियामा हुने आर्थिक लेनदेन । यो विकृतिलाई नजिकबाट देखेका सेनापति थापाले आर्थिक लेनदेन, भनसुन, नातागोता हाबी हुने समस्या अन्त्यका लागि आवश्यक निर्देशन दिएका थिए, नीति बनाएका थिए ।

घुसखोरलाई कारवाही

आर्थिक लेनदेन, अनियमितता र भनसुन कार्यमा संलग्न ३ अधिकृत, १ पदीक र १६९ अन्य दर्जा समेत गरी १७३ जनालाई सैनिक ऐन बमोजिम कारवाही गरिएको नेपाली सेनाका प्रवक्ता सहायक रथी विज्ञानदेव पाण्डेले बताए । उनका अनुसार २१ अधिकृत, ५ जना पदीक र ५ अन्य दर्जा समेत ३१ जनालाई सचेत समेत गराइएको छ ।

सैनिक भर्ना प्रक्रियालाई पारदर्शी, वैज्ञानिक र कानूनसम्मत बनाउन प्रक्रियागत सुधार समेत गरिएका छन् । छनौट प्रक्रियाका क्रममा विद्युतीय हाजिरी र जैविक परिचयको व्यवस्था, सीसीटीभीको प्रयोग गरेर भर्ना प्रक्रियालाई पारदर्शी बनाउन भरमग्दुर प्रयास गरिएको सैनिक स्रोतले जनाएको छ । सुधारका अनेक प्रयासका बाबजुद अनैतिक क्रियाकलापमा संलग्नतालाई कडाभन्दा कडा कारवाही गर्ने नीति सेनापति थापाले लिएका छन् ।

नक्कली प्रमाणपत्रधारीको भागाभाग

शैक्षिक योग्यता र नागरिकताको नक्कली र कीर्ते प्रमाणपत्रका आधारमा जागिर खाने र बढुवामा पर्ने व्यक्ति समेत कारवाहीमा परेका छन् । सेनापति थापाले नेतृत्व सम्हालेपछि सैनिक सकलदर्जाका प्रमाणपत्रमाथि छानबिन गरिएको छ । छानबिनका क्रममा कैफियत देखिएका प्रमाणपत्रधारीलाई कारवाही प्रक्रिया अगाडि बढाइएको छ ।

थापाले नेतृत्वमा आएपछि नेपाली सेनामा कार्यरत सकलदर्जाको शैक्षिक योग्यताको प्रमाणपत्र, नागरिकता लगायत कागजातको बृहत् छानबिन गरिएको छ । प्रमाणपत्र गलत देखिएपछि कारवाहीमा पर्ने डरले केही व्यक्तिले सैनिक सेवा नै छाडेर गएका छन् । प्रमाणपत्रमा कैफियत देखिएपछि ११ जना अन्य दर्जा र १ जना अधिकृतलाई सैनिक ऐन बमोजिम कारवाही गरिएको प्रवक्ता पाण्डेले बताए । उनका अनुसार अन्य केहीलाई कारवाहीको दायरामा ल्याउन छानबिन भइरहेको छ ।

आर्थिक अनुशासनमा जोड

सैनिक संगठनभित्र आर्थिक अनुशासन कायम गर्न समेत सेनापति थापाले विशेष नीति लागू गरेका छन् । आर्थिक अनियमितता र भ्रष्टाचारलाई शून्य सहिष्णुताको नीति, नेपाली सेनाको बजेट आचारसंहिता २०७५, बजेट सम्बन्धी आन्तरिक निर्देशिका २०७५ लागू गरिएको छ । सैनिक संगठनको बजेटलाई सदुपयोग गर्न र दुरुपयोग रोक्न बजेट कार्यान्वयनको अनुगमनलाई प्रभावकारी बनाइएको प्रवक्ता पाण्डेले बताए ।

‘बजेट सदुपयोग र भ्रष्टाचार रोक्ने प्रयास गर्दागर्दै पनि केही व्यक्तिगत लाभका लागि बजेट दुरुपयोग गर्ने व्यक्तिलाई कारवाहीको दायरामा ल्याएर दण्डित गरिएको छ,’ उनले भने । आर्थिक सुशासन र बजेट सदुपयोगको अवस्था अध्ययन गर्न सेनापतिबाट उच्च स्तरीय आन्तरिक समिति गठन गरिएको छ । आर्थिक सुशासन कायम नगर्नेलाई कडा कारवाहीको नीति  लिइएको छ ।

सैनिक संगठनमा कार्यरत सदस्यलाई नैतिकवान र मर्यादित बनाउन गर्न हुने, गर्न नहुने र गर्नैपर्ने कार्यको बारेमा सुसूचित गराउन सैनिक आचारसंहिता संग्रह २०७६ प्रकाशन गरी वितरण गरिएको छ । बैशाख महिनालाई सैनिक आचारसंहिता सप्ताहका रुपमा बृहत् रुपमा मनाइएको छ । गलत नियत वा अज्ञानताले हुनसक्ने अनपेक्षित कार्य न्यूनीकरण गर्न साक्षरता कार्य सहयोगसिद्ध हुने सैनिक नेतृत्वले विश्वास लिएको छ । 

(सैनिक संगठनभित्र सुधार गर्ने र विकृति हटाउने प्रयास सँगसँगै दीर्घकालीन महत्त्वका संरचनागत समृद्धिका काम भइरहेका छन् । के–के हुन् त सेनामा समृद्धि ल्याउने काम ? विस्तृत आगामी भागमा । ( सम्पादक)

यो पनि पढ्नुहोस् –

सेनापति थापाको १ वर्ष : सैनिक जवान तहसम्मै उत्प्रेरणा र सुखद सञ्चार (भाग–१)

Comments

comments

Now Get KathmanduPati App on your mobiles.

Android App iOS App
ad

Now get KathmanduPati App on your mobiles.

Android App iOS App
Scroll to Top