काठमाण्डु – प्रधानमन्त्री शेरबहादुर देउवा नेतृत्वको सरकारमा सहभागी हुने विषयमा नेकपा एमालेको माधव नेपाल समूह विभाजित देखिएको छ । नेपाल समूहको एक पक्ष पार्टी एकतालाई केन्द्रमा राखेर अगाडी बढ्नुपर्नेमा जोड दिएको छ भने अर्काथरी भने पार्टी फुटाएरै भएपनि सरकारमा सहभागी बन्नुपर्ने तर्क गर्छन् ।

बुधबार पाँच दलीय गठबन्धनको बैठकमा नेपाल समूहका नेता डा. विजय पौडेलले आफूहरु सरकारमा सहभागी नहुने बताएका थिए । तर नेपाल पक्षमा रहेका २२जना सांसदले भने कानूनी अड्चन फुकाएर भएपनि सरकारमा सहभागी बन्न नेता नेपाललाई दवाब दिएका छन् । नेपाल पक्षका सांसद मेटमणी चौधरीले अध्यक्ष केपी शर्मा ओलीसँग विचारमा अलग भएकाले सँगै बस्नुको कुनै अर्थ नहुने बताए ।

‘देउवाजीलाई प्रधानमन्त्रीमा नियुक्त गर्न हामीले सुरुदेखि नै पहल गरेका हौं । अहिले नै सरकारमा जान हामीलाई कानूनी अड्चनहरु छन् । तीनलाई फुकाएर एकिकृत कम्युनिष्ट पार्टी निर्माण गर्छौं,’ उनले भने, ‘एमाले केपी ओलीको पार्टी हो भन्छन् । उहाँहरुसँग विचार नै अलग भएपछि सँगै बसिरहनुको के अर्थ ?’

गत साउन ३ गते प्रधानमन्त्री देउवालाई नेपाल पक्षका २२ जना सांसदले विश्वासको मत दिएका थिए । देउवालाई विश्वासको मत दिने सांसदहरुले अध्यक्ष ओलीसँग वारपार गर्नुपर्ने सुझाव दिएका थिए । उनीहरुले पार्टीमा मिल्न नसक्ने भए कानूनी रुपमा अलग हुन सुझाव दिएका हुन् ।

‘एकताका लागि पटक–पटक छलफल र वार्ता भइसकेका छन् । अब पनि अल्मलिएर बस्न सकिँदैन । हामीले तपाईको साथमा हामी छौं भनेका छौं । उहाँ (नेपाल)ले अन्य नेताहरुसँग छलफल गर्ने जवाफ दिनुभएको छ,’ नेपाल समूहका एक सांसदले भने ।

अर्का सांसद कृष्णकुमार श्रेष्ठ किसानले आफूहरुको पहिलो प्राथमिकता पार्टी एकता भएको बताए । उनले सम्मानजनक एकता भए मात्र स्वीकार गर्न सुझाव दिएको बताए । सांसद श्रेष्ठले देउवा नेतृत्वको सरकार निर्माणमा महत्वपूर्ण भूमिका खेलेकाले अन्तिम निर्णय गर्ने अधिकार नेता नेपाललाई दिएको जानकारी दिए ।

‘हाम्रै मतबाट पुनस्र्थापित संसद् र संसद्मा मत दिएर सरकार र संसद् दुवैलाई प्रभावकारी बनाउन भूमिका खेल्नुपर्छ । त्यसबारे अन्तिम निर्णय गर्ने अधिकार वरिष्ठ नेतालाई नै दिएका छौँ,’ उनले भने ।

यता नेपाल पक्षको अर्को समूह पार्टी फुटाएर जाने मनस्थितिमा छैन् । नेपाल पक्षका घनश्याम भुसाल, सुरेन्द्र पाण्डे, योगेश भट्टराई, गोकर्ण विष्ट, रघुजी पन्तलगायतका प्रभावशाली नेताहरु एकताको पक्षमा छन् । उनीहरुले एमालेभित्र रहेर संघर्ष गर्नुपर्ने बताउँदै आएका छन् ।

वारपार गर्न अध्यक्ष ओलीको निर्देशन

एमाले अध्यक्ष केपी शर्मा ओलीले नेपाल पक्षसँगको वार्ता वारपार गर्न निर्देशन दिएका छन् । बुधबार पार्टी कार्यालय थापाथली पुगेका अध्यक्ष ओलीले शनिबारसम्म नेपाल समूहसँगको वार्ता वारपार गर्न महासचिव ईश्वर पोखरेललाई निर्देशन दिएका हुन् । उनले शनिबार स्थायी कमिटी बैठक बोलाउने गरी तयारी थाल्न महासचिव पोखरेललाई निर्देशन दिएका हुन् ।

‘पार्टीलाई एकताबद्ध बनाउन मैले धेरै लचकता अपनाई सकें । अब धेरै पर्खनु हुँदैन । शनिबारसम्म सबै मिलाउनूस् । सोही दिनको स्थायी कमिटी बैठकमा निर्णय गरौंला भन्नुभएको छ’, अध्यक्ष ओली निकट एक सांसदले भने ।

उनको निर्देशनसँग विघटित कार्यदलका सदस्यहरु आन्तरिक छलफलमा जुट्ने भएका छन् । उनीहरुबीच आजै भेटवार्ताको तयारी भएको छ । विघटित कार्यदलमा ओली पक्षबाट सुवास नेम्वाङ, बिष्णु पौडेल, प्रदीप ज्ञवाली, शंकर पोखरेल र बिष्णु रिमाल छन् भने माधव नेपाल पक्षबाट भीम रावल, घनश्याम भुसाल, सुरेन्द्र पाण्डे, गोकर्ण विष्ट र रघुजी पन्त छन् ।