काठमाण्डु- काठमाण्डुको ठमेलस्थित एक रक्सी कारखानामा अवैधरुपमा चिनियाँ रक्सी उत्पादन गर्ने चिनियाँ नागरिकलाई प्रहरीले पक्राउ गरेको छ । महानगरीय प्रहरी अपराध महाशाखाको टोलीले उक्त रक्सी उत्पादन गर्ने कारखानामा छापा मारेर सञ्चालक चीनको जियाङ्गसु प्रान्त घर भएका सिजि उईलाई पक्राउ गरेको हो ।

उईले ठमेल स्थित छिन्ता लामाको घर भाडामा लिएर सञ्चालन गरिएको लोकल मदिरा कारखानामा महानगरीय अपराध महाशाखाको टोलीले छापा मारेर करिब १० हजार लिटर मदिरा पनि बरामद गरेको छ । सिजि उईले ‘चिनियाँ कोदोको शुद्ध लोकल रक्सी’ नामक मदिरा उत्पादन गर्ने गरेका थिए ।

लोकल रक्सी उत्पादन गर्ने मेशिन पनि प्रहरीले बरामद गरेको छ । रक्सी उत्पादन गर्ने चिनियाँले ५ तले घर भाडामा लिए त्यहाँ होटल पनि सञ्चालन गरेका थिए । ‘होटल स्वीट ठमेल होटल एण्ड रेष्टुरेन्ट’ काठमाडौं महानगरपालिका वडा नम्बर–२६ मा दर्ता गरेको पाइएको छ । बरामद मदिरा आन्तरिक राजस्व कार्यालयलाई थप अनुसन्धान र कारवाहीका लागी बुझाइने महाशाखाले जनाएको छ ।