काठमाण्डु– राष्ट्रिय प्रकृति संरक्षण कोषका सदस्य सचिव शरद अधिकारीलाई वन तथा वातावरण मन्त्रालयले स्पष्टिकरण सोधेको छ ।

राष्ट्रिय कर्मचारी युनियनले बुधवार अधिकारीले एनटिएनसीको स्रोत साधनहरुको दुरुपयोग गरेको,कर्मचारीहरुलाई पूर्वाग्रह सांधेर हटाएको,विना प्रतिस्पर्धा कर्मचारी भर्ना गरेको र सरुवा बढुवा एवंम् वृति विकाशमा स्वेच्छाचारी र अपारदर्शी निर्णय गरेर कोषका कर्मचारीलाई विनियम,विधि र प्रक्रियालाई वेवास्ता गरेर अन्याय गरेको भन्दै ज्ञापनपत्र बुझाएको थियो ।

वन तथा वातावरणमन्त्री राम सहाय प्रसाद यादवलाई कोषका कर्मचारीहरुले ज्ञापनपत्र बुझाएकै दिन मन्त्रालयलयले बुधवार ३ दिनभित्र जवाफ दिन अधिकारीलाई पत्र काटेको हो । यसअघि कर्मचारी संगठनले तिन पटक उनलाई मागपत्र बुझाएको थियो । तर, उनले उल्टै कोषका कर्मचारीलाई राजनीतिक आस्था र व्यक्तिगत पूर्वाग्रह सांधेर सरुवा गरेको, जागिरबाट निष्काशन गरेको र आफुखुसी प्रक्रिया मिचेर बढुवा गरेपछि उनिहरुले बुधबार मन्त्री यादवलाई भेटेर गुनासो गरेका हुन ।

अधिकारीलाई एमाले अध्यक्ष केपी ओली प्रधानमन्त्री र वनमन्त्री शक्ति बस्नेत हुंदा कोषको सदस्य सचिव बनाइएको थियो । अधिकारीले माओवादी केन्द्रका अध्यक्ष पुष्पकमल दाहाल, एकिकृत समाजवादीका अध्यक्ष माधव कुमार नेपाल र वरिष्ठ नेता झलनाथ खनालमार्फत सदस्य सचिव बन्न दबाव दिएका थिए ।

ओली नेतृत्वको सरकार ढल्नुभन्दा केही दिन अघि मात्र उनको नियुक्ती भएको थियो । उनले नियुक्तीका लागी तत्कालिन अख्तियार प्रमुख नविन घिमिरेदेखी यति ग्रुपका मालिक सोनाम शेर्पासम्मको शक्ति प्रयोग गरेका थिए । विशेषगरी नेता नेपालले उनलाई नियुक्तीका लागी दबाव दिएका थिए । अधिकारी अख्तियार दुरुपयोग अनुसन्धान आयोगमा संचार विज्ञ थिए । त्यही बेला नै ललिता निवास प्रकरणमा माधव नेपालको फाइल अख्तियारले अनुसन्धान गरिरहेको थियो । नेता नेपाललाई उक्त प्रकरणमा अधिकारीले गुन लगाएकाले उनको नियुक्तीका लागी उनले जोडबल गरेको स्रोतको दावी छ ।

अधिकारी त्यसभन्दा पहिले कोषमै सामान्य अधिकृतका रुपमा कार्यरत थिए । उनको कोषका कर्मचारीहरुसंग सुरुदेखी नै सुमधुर सम्बन्ध नभएको बताइन्छ । अधिकारी र मन्त्रालय नेतृत्वको सम्बन्ध समेत विग्रेको छ । जसले गर्दा मन्त्रालय अन्नपूर्ण संरक्षण क्षेत्र र मनास्लु संरक्षण क्षेत्रको म्याद पनि नथप्ने र आर्थिक सहयोग समेत नगर्ने लाइनमा देखिएको छ । अधिकारीको नियुक्ती भएकै दिनदेखी कोषले कुनै उल्लेख्य काम समेत गर्न सकेको छैन । संस्था दिनानुदिन आर्थिक संकटमा समेत फस्दै गएको त्यहांकै कर्मचारीहरु बताउंछन् ।

सदस्य सचिव अधिकारी र मन्त्रालय नेतृत्वको द्धन्द्ध बुधवार जु को २६ औं वार्षिकोत्सव कार्यक्रममा समेत देखिएको छ । उक्त कार्यक्रममा वनमन्त्री शाह र सचिव प्रेम नाराणय कंडेललाई बोलाइएको भएपनि उनिहरु कार्यक्रममा सहभागी भएनन । मन्त्रालयले यसअघि पनि अधिकारीलाई पटक पटक स्पष्टिकरण सोधेको मन्त्रालय स्रोत बताउंछ ।