काठमाण्डु- मंगलबार चिलीमा अचानक विद्युत आपूर्ति बन्द हुँदा जनजीवन ठप्प भयो र देशका अधिकांश भागहरू अन्धकारमा डुबे । यसका कारण ट्राफिक नराम्ररी प्रभावित भयो र इन्टरनेट सेवा पनि बन्द भयो । इन्टरनेट बन्द भएपछि व्यवसाय र दैनिक जीवन पनि ठप्प भयो ।

अधिकारीहरूले बिजुली पुनस्र्थापित गर्ने प्रयास गरिरहेका छन् । तर, परिस्थितिलाई ध्यानमा राख्दै चिली सरकारले आपतकालीन अवस्था घोषणा गरेको छ र अनिवार्य रात्रि कर्फ्यू लगाएको छ ।

बिजुली आपूर्ति बन्द भएपछि विश्वको सबैभन्दा ठूलो तामा उत्पादक देशमा खानीको काम पनि रोकिएको छ । बिजुलीका पम्पहरूले काम नगरेकाले धेरै क्षेत्रका मानिसहरूले पानीको अभाव भएको गुनासो गरेका छन् । यद्यपि आपतकालीन जेनेरेटरको सहयोगमा अस्पताल र सरकारी कार्यालयहरू सञ्चालनमा राख्न प्रयास भइरहेको छ ।

चिलीका आन्तरिक मन्त्री क्यारोलिना टोहाले विद्युत् आपूर्ति बन्द हुनुको कारण अझै पत्ता नलागेकाले अवस्था झनै खराब हुन सक्ने चेतावनी दिएकी छिन् ।

अवस्था यति खराब छ कि चिली सरकारले अन्धकारमा डुबेका क्षेत्रहरूमा मानिसहरूको सुरक्षाको लागि सेना तैनाथ गरेको छ । साथै, सुरक्षाकर्मीहरूले अँध्यारो सडकहरूमा ट्राफिक व्यवस्थापन गरिरहेका छन् । सबै व्यवसाय, चलचित्र थिएटर, सांस्कृतिक कार्यक्रम, खेलकुद कार्यक्रम रद्द गरिएका छन् । यी परिस्थितिहरूका कारण मानिसहरूमा भ्रम र डर पैदा भएको छ ।

सरकारले मानिसहरूलाई घरभित्रै बस्न अपील समेत गरेको छ । यसका कारण देशको हवाई यातायात पनि नराम्रोसँग प्रभावित भएको छ र धेरै उडानहरू रद्द गरिएका छन् ।