काठमाण्डु – काठमाण्डुको जडिबुटीमा रोकिराखेको बसमा स्कुटर ठोकिँदा दुई युवकको मृत्यु भएको छ।

काठमाण्डु महानगरपालिका–३२ जडिबुटी आकाशेपुल नजिकै रोकिएको बा .प्र. ०१-००६ ख ४२४३ नम्बरको अरनिको यातायातको बसको पछाडि शुक्रबार बिहान कोटेश्वरबाट जडिबुटीतर्फ जाँदै गरेको लु.४३ प ४९३८ नम्बरको स्कुटर बसको पछाडि ठोकिँदा दुई युवकको मृत्यु भएको जिल्ला प्रहरी परिसर काठमाण्डुका एसपी अपिलराज बोहोराले जानकारी दिए।

मृत्यु हुनेमा स्कुटर चालक नवलपरासीको सुनौल नगरपालिका–का हाल भक्तपुरको लोकन्थली बस्दै आएका २२ वर्षीय शिरिस पौडेल र काभ्रेको पाँचखान नगरपालिका–२ होस्के घर भएका २३ वर्षीय नितेश नेपाल छन्।

दुर्घटनामा गम्भीर घाइते भएका उनीहरूलाई उपचारको लागि तत्काल ट्रमा सेन्टर लगिएको थियो। उनीहरूको उपचारको क्रममा मृत्यु भएको हो।

घटनामा संग्लन दुवै सवारी साधन कोटेश्वर ट्राफिकको नियन्त्रणमा छन्। बस चालक दोलखा घर भइ हाल काँडाघारी बस्ने वर्ष २५ का सुभाष तामाङलाई प्रहरीले नियन्त्रणमा राखेको छ।