काठमाण्डु – स्वास्थ्य तथा जनसंख्या मन्त्री प्रदीप पौडेलले कृषिसँगको सम्बन्ध टुट्दै गएको कारणले गाउँबस्तीहरू रित्तिँदै गएका बताएका छन् ।

सोमबार काठमाण्डुमा आयोजित जनता बृहत् सांस्कृतिक साँझ २०८२ मा बोल्दै उनले कृषिसँगको सम्बन्ध टुटेपछि गाउँहरू रित्तिँदै गएको भन्दै पहाडबाट पलायन भएको जनशक्तिलाई फर्काउने अवस्था निर्माण गर्नुपर्ने बताए ।

उनले भने, ‘पहाडबाट पलायन भएको जनशक्ति अथवा नागरिकलाई उतैतिर फर्काउने अवस्था कसरी निर्माण गर्न सकिन्छ । मेरो विचारमा कृषिसँगको सम्बन्धले हाम्रा गाउँबस्तीहरू जनसांख्यिक हिसाबले सम्पन्न थिए । कृषिसँगको सम्बन्ध टुट्दै गएको कारणले हाम्रा गाउँबस्तीहरू रित्तिँदै गएको अवस्था सिर्जना भएको छ ।’

आजको जलवायु परिवर्तन र पर्यावरणीय प्रदूषणका कारण मानिस गाउँ फर्किनुपर्ने अवस्था सिर्जना हुन लागेको भन्दै उनले त्यसका लागि शिक्षा, स्वास्थ्य र यातायात जस्ता कुराको विकास गाउँमा पनि गर्नुपर्ने बताए ।

उनले भने, ‘हाम्रो समृद्धिको आधार पनि कृषि नै हो । त्यसैले आधुनिक कृषि प्रणाली पहाडमा कसरी विकास गर्ने, आजको यो जलवायु परिवर्तन अथवा पर्यावरणीय प्रदूषणले गर्दा हामी फेरि फर्किने गाउँतिरै हो । शहरमा धेरै बसिन्छ जस्तो लाग्दैन तर हामी त्यता फर्किनको लागि शिक्षा, स्वास्थ्य र यातायात जस्ता कुरामा विकास गरेको हुनुपर्छ ।’

सोही क्रममा जनता पूर्व विद्यार्थी समाजको अध्यक्ष जलेश्वर पाण्डेले कार्यक्रमले थोरै भए पनि सांस्कृतिक तथा सांगीतिक परम्परा, अभ्यास र प्रवृत्तिप्रति सबैलाई सजक बनाउँदै एकताबद्ध गर्न योगदान पुर्‍याउने आशा गरेको बताए ।