काठमाण्डु – देशभरका मुख्य राजमार्ग तथा सडक खण्डहरूको अवस्थाबारे सडक विभागले पछिल्लो अवस्था सावर्जनिक गरेको छ ।

सोमबार दिउँसो १२:४५ बजेसम्मको अवस्थाबारे जानकारी दिदै विभागले नागढुङ्गा–मुग्लिन, नारायणगढ–बुटवल, मुग्लिन–नारायणगढ, सिद्धार्थ राजमार्ग, त्रिभुवन राजमार्ग, कालीगण्डकी करिडोर (डेढगाउँ–गैंडाकोट) र धरान–धनकुटा सडक खण्डमा कुनै अवरोध नभई सवारी आवागमन सहज भएको जनाएको छ ।

तर काठमाण्डु–फर्पिङ हुँदै भैसे–हेटौंडा र खुलेखानी–सिस्नेरी–काठमाण्डु सडक खण्डमा पहिरो र नदी कटानका कारण यातायात अवरुद्ध भएको छ । खुलेखानी–फाकेल–काठमाण्डु सडकमा भने एकतर्फी आवागमन खुला गरिएको जानकारी दिएको छ ।

अरनिको राजमार्गमा एकतर्फी आवागमन भइरहेको छ भने कान्ति लोकपथको घट्टे पाखामा पुन: पहिरो खसेर बाटो अवरुद्ध भएको विभागले जनाएको छ । मेची करिडोरमा माईखोला र पुवाखोला पुल बगाएको र थादे खोलाको बक्स कल्भर्ट क्षेत्रमा डुबान भएर यातायात सञ्चालन कठिन भएको छ ।

हुलाकी सडकको वीरगञ्ज क्षेत्रमा क्षति नभए पनि कमला क्षेत्रमा बाढी सतह उच्च छ भने कन्काई पुल नजिकै सडक बगाएको र लोहन्द्रा पुलमा भराइको जोखिम बढेको छ ।

पूर्वपश्चिम महेन्द्र राजमार्ग अर्न्तगत मेची नगरपालिका–१ मा काली खोलाको डाइभर्सन बगाउँदा अवरुद्ध भएको छ । सम्बन्धित निकायले करिब बेलुकी ५ बजेसम्म वैकल्पिक व्यवस्था पूरा गर्ने जनाइएको छ ।

मध्यपहाडी राजमार्गको रामेछाप–सिन्धुली खण्डमा उपकरण परिचालन भइसकेको छ । खुरकोट–घुर्मी र जयाराम–हलेसी खण्डमा एकतर्फी सवारी सञ्चालन भइरहेको छ भने बाँकी खण्डमा मर्मत कार्य जारी छ ।

मेची राजमार्गमा जोरकलशदेखि माइखोला रक्सेसम्म विभिन्न स्थानमा सडक बगाउँदा अवरोध भएको छ । कतिपय स्थानमा पुनर्निर्माणका लागि ३–४ दिन लाग्ने अनुमान गरिएको छ ।