काठमाण्डु – अध्यागमन विभागले नेपालमा रहेका विदेशी नागरिकको निगरानी, यात्रा व्यवस्थापन र सहजीकरणका लागि ‘विदेशी नागरिक व्यवस्थापन सूचना प्रणाली ’लागू गरेको छ।

पहिलो चरणमा काठमाण्डु उपत्यकाका तारे होटल, ट्राभल एजेन्सी र मनि एक्स्चेन्जमा प्रणाली लागू गरिएको छ भने दोस्रो चरणमा उपत्यका बाहिर विस्तार गरिनेछ।

यस प्रणालीले विदेशी नागरिकको गतिविधि, बसोबास र भिसा अवस्थाबारे सूचनाको आदानप्रदान सहज बनाउने र सम्भावित अपराध नियन्त्रण तथा पर्यटन प्रवर्द्धनमा सहयोग गर्ने विभागले जनाएको छ।

विभिन्न भिसामा नेपाल भित्रिएका विदेशी नागरिक अध्यागमन कानुन विपरीत अरु नै गतिविधिमा संल्लग्न हुन नदिन निगरानी, नियमन र व्यवस्थापन तथा यात्रा सहजीकरण गर्न यो प्रणाली लागू गरिएको हो ।

विभागका महानिर्देशक रामचन्द्र तिवारीका अनुसार दोस्रो चरणमा उपत्यका बाहिरका होटल, ट्राभल एजेन्सीलगायतमा लागू गर्ने विभागको तयारी छ । नेपालमा एउटा भिसा प्रयोजनमा भित्रिएका विदेशी अरु नै गतिविधिमा संलग्न हुने गरेको, ओभर स्टे, अन्य फौजदारी कसुरलगायतमा सक्रिय हुने गरेकोले कारबाहीको दायरामा ल्याउन देखि यात्रामा रहेकालाई सहजीकरण गर्न एकीकृत संयन्त्र वकास गर्न लागिएको महानिर्देशक तिवारीले बताए ।

नेपाल भ्रमण गर्ने विदेशी नागरिकहरूको सुरक्षा, सूचनामा सहजीकरण, सम्भावित अपराध नियन्त्रण र पर्यटन प्रवर्द्धनमा सहयोग गर्ने उद्देश्यले विभागले यो प्रणाली विकास गरिएको हो । यसबाट नेपाल भित्रिएका विदेशी नागरिक बसेको, उनीहरु कुन ठाउँमा रहेको, भिसा कानुन अनुसार भएनभएकोलगायत जानकारी प्रणाालीमा आवद्ध संस्थाले विभागलाई आवद्ध प्रणाालीबाटै दिनुपर्ने छ ।

विदेशी नागरिक होटलमा बसेको र बाहिरिएको विवरण प्रणालीबाटै अध्यागमनलाई जानकारी गराउनुपर्ने छ । ‘हाम्रो सीमाभित्र जुनसुकै प्रयोजनका लागि विदेशी नागरिक आउँछन्, उनीहरूको गतिविधि राज्यको सूचनामा हुनु आवश्यक, त्यसैका लागि यो प्रणाली लागू गरिएको हो,’ महानिर्देशक तिवारीले भने ।