काठमाण्डु – गृहमन्त्री ओम प्रकाश अर्यालले काठमाण्डुमा रहेका २ कारागार कार्यालयहरू केन्द्रीय कारागार कार्यालय जगन्नाथदेवल र कारागार कार्यालय डिल्लीबजारका साथै केन्द्रीय कारागार अस्पताल त्रिपुरेश्‍वरको स्थलगत निरीक्षण गरेका छन् ।

गृहसचिव, गृह मन्त्रालयको शान्ति तथा सुरक्षा महाशाखाका प्रमुख, कारागार व्यवस्थान विभागका महानिर्देशक, नेपाल प्रहरीका प्रहरी नायव महानिरीक्षक लगायत उच्च अधिकारीको टोली लिई कारागार निरीक्षणको लागि पुगेका मन्त्री अर्यालले २ कारागार कार्यालयहरू र १ कारागार अस्पतालको निरीक्षणको क्रममा कारागारहरू र अस्पतालको वस्तुस्थितिबारे जानकारी लिई गर्नुपर्ने आवश्यक सुधारको लागि निर्देशन दिए ।

मन्त्री अर्यालले केन्द्रीय कारागार कार्यालय जगन्‍नाथदेवलमा रहेका केन्द्र, भद्र र महिला सुधार गृहको निरीक्षण गर्दै त्यहाँ राखिएका कैदीबन्दीसँग भेट गरी उनीहरूका पीरमर्का, गुनासाहरूबारे जानकारी लिए । कारागार कार्यालय डिल्लीबजारका महिला र पुरुष ब्लकहरूमा पुगी त्यहाँ राखिएका बन्दीहरूसँग समेत भेटघाट गर्दै राज्यका तर्फबाट बन्दीहरूलाई उपलब्ध गराइएका सुविधा प्राप्तिको अवस्थाबारे चासो व्यक्त गरे ।

निरीक्षणको क्रममा सम्बन्धित कारागारका कारागार प्रशासकहरूले कारागारको क्षमता, भौतिक अवस्था बन्दीहरूको संख्या लगायतबारे मन्त्री अर्याललाई जानकारी गराए । मन्त्री अर्यालले कारागारमा रहेका वृद्ध तथा दीर्घरोगी बन्दीहरूको सम्बन्धमा चिन्ता र चासो व्यक्त गर्दै उनीहरूको सजाय भुक्तानका सम्बन्धमा कानून अनुसार प्राप्त हुने राहत उपलब्ध गराउनुपर्ने धारणा व्यक्त गरे ।

मन्त्री अर्यालले कारागारहरूको निरीक्षणपश्चात बन्दीगृहमा मानव अधिकारको प्रत्याभूतिमा कुनै सम्झौता नगर्न सम्बन्धित अधिकारीलाई निर्देशन दिए । मन्त्री अर्यालले कारागार कार्यालयहरूको भौतिक पुर्वाधार सुधार तथा अत्यावश्यक सेवाको उपलब्धताको लागि मन्त्रालयको तर्फबाट पूर्ण सहयोगको प्रतिबद्धता व्यक्त गर्दै कारागार व्यवस्थापन विभागमार्फत कारागार कार्यालयहरूको सुधारको मार्गचित्र यथासिघ्र मन्त्रालयमा पेश गर्न सम्बन्धित कारागार प्रशासकहरूलाई निर्देशन दिए ।

केन्द्रीय कारागार अस्पताल त्रिपुरेश्वरको निरीक्षण गरी मन्त्री अर्यालले अस्पतालमा उपचाररत बन्दीहरूको स्वास्थ्य अवस्थाबारे जानकारी लिई अस्पतालको सेवालाई थप सुदृढ बनाउने प्रतिबद्धता व्यक्त गरेका छन् ।