काठमाण्डु – प्रसिद्ध भारतीय गायिका आशा भोसलेको निधन भएको छ। आइतबार दिउँसो मुम्बईको ब्रीच क्यान्डी अस्पतालमा ९२ वर्षको उमेरमा उनको निधन भएको हो ।

उनलाई शनिबार साँझ त्यहाँ भर्ना गरिएको थियो। त्यतिबेला उनलाई हृदयघात भएको र छातीमा समस्या भएको रिपोर्ट आएको थियो।

आशा भोसलेले आफ्नो करियरमा १२,००० भन्दा बढी गीत गाएकी छिन्। उनका दम मारो दमु, पिया तू अब तो आजा, र चुरा लिया है तुमने जस्ता गीतहरू सदाबहार छन्।

आशा भोसले प्रसिद्ध रंगमञ्च अभिनेता तथा शास्त्रीय गायक दीनानाथ मंगेशकरकी छोरी तथा प्रसिद्ध गायिका लता मंगेशकरकी कान्छी बहिनी हुन्। उनको बुबाको मृत्यु उनी केवल नौ वर्षको हुँदा भएको थियो, जसले गर्दा उनले परिवारलाई सहयोग गर्न आफ्नी बहिनी लता मंगेशकरसँग गाउन थालिन्।

सन् १९३३ मा सांगली (महाराष्ट्र) को प्रख्यात मङ्गेशकर परिवारमा जन्मिएकी आशाले ९ वर्षको उमेरबाट व्यावसायिक गायन सुरु गरेकी थिइन्। उनले सन् १९४३ मा आफ्नो पहिलो चलचित्र गीत रेकर्ड गराएकी थिइन्।

५० को दशकसम्म बलिउडमा आफ्नो बलियो स्थान बनाइसकेकी आशाले झण्डै आठ दशक लामो करियरमा हजारौं गीत गाएकी छन्। उनले ठूलो संख्यामा नेपाली गीत पनि गाएकी छन्।

उनले सात पटक ‘फिल्मफेयर उत्कृष्ट महिला पार्श्व गायिका’ अवार्ड जितेकी थिइन्। ‘दिल चिज क्या है’ (उमराव जान) र ‘मेरा कुछ सामान’ (इजाजत) का लागि उनले दुई पटक राष्ट्रिय चलचित्र पुरस्कार प्राप्त गरेकी थिइन्।

१६ वर्षको उमेरमा, आशा भोसलेले भागेर आफ्नी जेठी बहिनी लताकी ३१ वर्षीया सचिव गणपतराव भोसलेसँग विवाह गरिन्। लता र उनको परिवार विवाहको कडा विरोधमा थिए ।

घरपरिवारबाट दुर्व्यवहार भएपछि सन् १९६० मा तीन सन्तानसहित उनी अलग भइन्। पछि सन् १९८० मा उनले प्रसिद्ध संगीतकार आरडी बर्मन (पन्चम दा) सँग विवाह गरिन्। बर्मनको सन् १९९४ मा निधन भएको थियो। पछिल्लो समय उनी आफ्नी नातिनी जनाई भोसलेसँग बस्दै आएकी थिइन्।

लताजस्तो महान गायिकाको छायाबाट बाहिर निस्केर आफ्नै पहिचान बनाउन आशालाई लामो संघर्ष गर्नुपरेको थियो । उनको निधनसँगै भारतीय संगीत जगतले एक युगीन स्वर गुमाएको छ ।