काठमाण्डु – अर्थ मन्त्रालयले सरकारी कर्मचारीहरूको तलब–भत्ता भुक्तानी प्रणालीमा परिवर्तन गर्ने निर्णय गरेको छ ।

अहिलेसम्म मासिक रूपमा दिइँदै आएको तलब सुविधा आगामी दिनमा अर्धमासिक (महिनामा दुई पटक) रूपमा वितरण गरिने भएको हो ।

मन्त्रालयबाट जारी पत्रअनुसार यो व्यवस्था कार्यान्वयनका लागि महालेखा नियन्त्रक कार्यालयलाई आवश्यक तयारी गर्न निर्देशन दिइएको छ ।

हालसम्म सरकारी कर्मचारीहरूले एकैपटक महिनाको अन्त्यमा तलब बुझ्दै आएका थिए । तर नयाँ प्रणाली लागू भएपछि अब महिनामा दुई चरणमा तलब पाउने व्यवस्था हुनेछ ।

अर्थसचिव डा. घनश्याम उपाध्यायका अनुसार हप्ता–हप्तामा तलब–भत्ता दिने अन्तर्राष्ट्रिय अभ्यास पनि छ । खासगरी सार्वजनिक वित्तमा पर्ने चापलाई कम गर्न यस्तो गर्ने प्रचलन छ । नेपालमा भने यो नौलो अभ्यास हो । सुरुवातमा राष्ट्रसेवक कर्मचारीबाट यसको पाइलटिङ गर्न खोजिएको हो । क्रमशः सबै कर्मचारीमा कार्यान्वयन गर्दै लैजाने तयारी सरकारको छ ।