काठमाण्डु- विश्व फुटबलको सबैभन्दा ठूलो प्रतियोगिता FIFA World Cup 2026 आगामी जुन ११ देखि जुलाई १९ सम्म United States, Mexico र Canada मा आयोजना हुँदैछ। २३औँ संस्करणको विश्वकप सुरु हुन अब एक महिनाभन्दा कम समय बाँकी रहँदा विश्वभरका फुटबल समर्थकहरूको ध्यान प्रतियोगितातर्फ केन्द्रित भएको छ।

यसपटकको विश्वकप इतिहासकै सबैभन्दा ठूलो संस्करणका रूपमा आयोजना हुँदैछ। पहिलो पटक तीन राष्ट्रले संयुक्त रूपमा प्रतियोगिता आयोजना गर्न लागेका हुन् भने पहिलो पटक ४८ राष्ट्रले सहभागिता जनाउँदैछन्। प्रतियोगितामा कुल १०४ खेल ३९ दिनसम्म सञ्चालन हुनेछन्।

विश्वकपका खेलहरू अमेरिका, मेक्सिको र क्यानडाका १६ शहरमा आयोजना गरिनेछन्। समय अन्तरका कारण नेपालमा अधिकांश खेलहरू मध्यरातिदेखि बिहानसम्म पर्ने भएका छन्। आयोजक राष्ट्रमा चाँडै सुरु हुने केही खेलहरू भने नेपाली समयअनुसार राति पौने १० र पौने ११ बजे सुरु हुनेछन्।

प्रतियोगिताको उद्घाटन खेल मेक्सिको र दक्षिण अफ्रिकाबीच हुनेछ। उक्त खेल नेपाली समयअनुसार मध्यराति १२:४५ बजे सुरु हुनेछ। अन्य खेलहरू पनि बिहान १ बजेदेखि १० बजेसम्म विभिन्न समयमा सञ्चालन हुने तालिका सार्वजनिक गरिएको छ।

विश्वकपको प्रत्यक्ष प्रसारण Himalaya Sports मार्फत नेपालमा उपलब्ध हुने जनाइएको छ।

समूह चरणअन्तर्गत ब्राजिल, अर्जेन्टिना, फ्रान्स, इंग्ल्यान्ड, जर्मनी, स्पेन, पोर्चुगल, नेदरल्यान्ड्स लगायतका बलिया टोलीहरू प्रतिस्पर्धामा रहनेछन्। प्रतियोगिताको फाइनल खेल नेपाली समयअनुसार साउन ४ गते मध्यराति १२:४५ बजे हुनेछ।