काठमाण्डु – श्रीलंका सरकारले पर्यटक भिसा शुल्क निःशुल्क गरेको छ । नेपालसहित ४० देशका नागरिकका लागि श्रीलंका सरकारले पर्यटक भिसा शुल्क निःशुल्क गरेको हो ।

यो निर्णयबाट अब नेपाली पर्यटकहरूका लागि श्रीलंकाको भ्रमण निकै सस्तो र सहज हुने भएको छ।

काठमाण्डुस्थित श्रीलंकाली दूतावासले जारी गरेको परिपत्रअनुसार यो नयाँ नीति सन् २०२६ मे २५ देखि नै लागू भइसकेको छ।

नयाँ व्यवस्थाअनुसार श्रीलंका भ्रमणमा जाने नेपालीहरूले ३० दिनको ‘डबल–एन्ट्री’ पर्यटक भिसा (इलेक्ट्रोनिक ट्राभल अटोराइजेसन–ईटीए) पूर्ण रूपमा निःशुल्क पाउनेछन्।

यो भिसा अवधिभित्र पर्यटकहरूले एक पटक श्रीलंका छोडेर पुनः फर्कन पाउने भए पनि भिसाको अवधि भने सुरुदेखि रिसेट नभई बाँकी रहेका दिनहरूका लागि मात्र मान्य हुनेछ।

यो निःशुल्क सुविधा लिनका लागि पर्यटकहरूले श्रीलंका पुग्नुअगावै आधिकारिक वेबसाइटमार्फत अनलाइन आवेदन दिई आफ्नो ईटीए अनुमति लिनुपर्नेछ। मे २५ को मितिभन्दा अगाडि नै भिसा आवेदन दिइसकेका व्यक्तिहरूले भने आफ्नो शुल्क फिर्ता दाबी गर्न पाउने छैनन्। शुल्करहित भिसाले आगन्तुकहरूको आर्थिक बोझ कम गर्ने उद्देश्य राखेको भए पनि देश प्रवेशका लागि गरिने नियमित सुरक्षा स्क्रिनिङ प्रक्रिया भने पहिले जस्तै नै कायम रहने दूतावासले स्पष्ट पारेको छ।

नेपालसहित यो विशेष सुविधा पाउने अन्य देशहरूमा भारत, चीन, मलेसिया, दक्षिण कोरिया, जापान, थाइल्याण्ड, अस्ट्रेलिया, न्युजिल्याण्ड, अमेरिका, क्यानडा र बेलायत रहेका छन्।

यसै गरी फ्रान्स, जर्मनी, इटाली, स्पेन र रसियाजस्ता कयौँ युरोपेली मुलुकहरूका साथै साउदी अरेबिया, कतार, संयुक्त अरब इमिरेट्स र कुवेत जस्ता खाडी राष्ट्रका नागरिकले पनि यो सुविधा पाउनेछन्।

माल्दिभ्स, सेशेल्स र सिंगापुरका नागरिकका लागि भने यो भिसा शुल्क पहिलेदेखि नै माफ गरिएको थियो, जसमा माल्दिभ्सका नागरिकले पारस्परिक सम्झौताअनुसार ९० दिनको भिसा पाउँछन्।