काठमाण्डु – सभामुख डोलप्रसाद अर्यालसँग नेपालका लागि साउदी अरबका राजदूत फाहद मोहम्मद ए. मनिखले उनको कार्यकक्षमा शिष्टाचार भेट गरेका छन् ।

त्यस अवसरमा सभामुख अर्यालले नेपालको संघीय संसद् साउदी अरबको शुरा काउन्सिलसँग सहकार्य गर्न इच्छुक रहेको उल्लेख गर्दै संघीय संसद्को हालैको निर्णयअनुसार नेपाल–साउदी अरब संसदीय मैत्री समूह गठन भएको जानकारी दिए ।

समूहका माध्यमबाट दुवै देशका संसद्बिच पारस्परिक हितका विषयमा सहकार्य गर्न सहज हुने विश्वास व्यक्त गरेको सभामुखको निजी सचिवालयले जनाएको छ ।

उनले नेपाल र साउदीबिच श्रम आप्रवासका क्षेत्रमा बढ्दो सहकार्यप्रति कृतज्ञताका साथ साउदी अरबले नेपालीलाई प्राथमिकता दिएकामा आभार व्यक्त गरेका छन् ।

राजदूत मनिखले साउदी अरब र नेपालबिचको सम्बन्धलाई अझ सुदृढ बनाउन आफू क्रियाशील रहेको बताउँदै श्रम, व्यापार, लगानी, पर्यटन तथा जनस्तरको सम्पर्कलाई विस्तार गर्न प्रतिबद्ध रहेको उल्लेख गरेका छन् ।

आगामी वर्ष नेपाल र साउदी अरबबिच कूटनीतिक सम्बन्ध स्थापना भएको ५० वर्ष पूरा हुँदैछ । युवा, श्रम तथा रोजगार मन्त्रालयका अनुसार हाल साउदीमा ३ लाख ८४ हजार ८६५ नेपाली कार्यरत छन् ।