काठमाण्डु– सत्तारुढ राष्ट्रिय स्वतन्त्र पार्टी (रास्वपा) सांसद अंकिता ठाकुरले पैसा अभावमा अस्पतालले उपचारबाट वञ्चित गरेपछि महिलाले सडकमा बच्चा जन्माउनुपरेको घटनालाई राज्य व्यवस्थामाथिकै गम्भीर प्रश्न भएको बताएकी छन् ।

बिहीबार प्रतिनिधिसभा बैठकमा बोृल्दै उनले भाषणमा नभई व्यवहारमै राज्यले यस्ता घटनालाई गम्भीरतापूर्वक लिनुपर्ने बताइन् । ठाकुरले स्वास्थ्य सेवामा देखिएको विभेदप्रति आक्रोश व्यक्त गरिन् ।

‘म भाषण होइन, हाम्रै राज्य प्रणालीले लेखेको एउटा भयानक र कारुणिक कथा सुनाउन उभिएकी छु’ उनले भनिन्, ‘जहाँ पैसाले आस र सास तय गर्छ त्यहाँ अस्पताल, अस्पताल रहँदैन ।’

राजविराजस्थित गजेन्द्रनारायण सिंह सगरमाथा अस्पतालले भर्ना नलिएपछि राजविराज नगरपालिका–१४ पर्साहीका हरेराम पासवानकी श्रीमती बबिताले फुटपाथमै शिशु जन्माएकी थिइन् ।

यसअघि उक्त घटनाबारे राष्ट्रिय स्वतन्त्र पार्टी (रास्वपा) सांसद खगेन्द्र कर्णले पनि संसद्मा उक्त विषय उठाएका थिए ।