काभ्रे– काभ्रेको रोशीखोलामा बाढीको जलसतहले खतराको तह पार गरेको छ ।

पनौतीस्थित जलमापन केन्द्रमा गरिएको मापनअनुसार रोशीमा पानीको सतह ४.५१ मिटर पुगेको छ ।

बाढी पूर्वानुमान महाशाखाले जोखिमको संकेत दिँदै तटीय क्षेत्रमा साइरन बजाइएको जनाएको छ ।

माथिल्लो जलाधार क्षेत्रमा वर्षा भइरहेकाले जलसतह थप बढ्न सक्ने सम्भावनालाई ध्यानमा राखेर तल्लो तटीय क्षेत्रमा सावधानी अपनाउन भनिएको महाशाखाको भनाइ छ ।

विगतमा डुबानमा पर्ने गरेको तल्लो तटीय क्षेत्रका बासिन्दालाई विशेष सतर्कता अपनाउन आग्रह भनिएको छ ।

खोला आसपासका बासिन्दालाई जलसतहको अवस्था निरन्तर निगरानी गर्न र जोखिम देखिए सुरक्षित स्थानतर्फ जान महाशाखाको आग्रह छ ।

यसअघि पनि रोशीखोलामा जलसतह बढेपछि पनौती जलमापन केन्द्रबाट तटीय क्षेत्रमा चेतावनी जारी गरिएको थियो ।

रोशीको जलाधारमा वर्षा बढ्दा छोटो समयमै खोलाको बहाव तीव्र रूपमा बढ्न सक्ने भएकाले महाशाखाले विशेष निगरानी गरिरहेको छ ।

बाढी पूर्वानुमान महाशाखाका अनुसार आगामी २४ देखि ४८ घण्टामा देशका विभिन्न जिल्लाका साना नदी तथा खोलामा आकस्मिक बहाव बढ्न सक्ने सम्भावना छ ।

आगामी केही दिन ठूला नदी तथा जलाधार क्षेत्रमा समेत जलसतह बढ्ने अनुमान गरिएको छ ।

नुवाकोटको त्रिशूली र भक्तपुरको हनुमन्ते खोलासहित विभिन्न नदी तथा खोलामा पनि जलसतह बढिरहेको महाशाखाले जनाएको छ ।

कोशी, नारायणी, कन्काई, कमला र तिनका केही सहायक नदीमा जलसतह सतर्कता तह आसपास वा माथि पुगेको छ ।