काठमाडौं– सर्वोच्च अदालतले राष्ट्रियसभाका लागि मनोनित तीन सदस्यलाई तत्काल शपथग्रहण नगराउन सरकारका नाममा अल्पकालीन अन्तरिम आदेश जारी गरेको छ।

न्यायाधीश प्रकाशमान सिंह राउतको एकल इजलाशले २० फागुनमा रिट निवेदक र सरकारलाई छलफलका लागि बोलाउँदै अल्पकालीन आदेश दिएको हो।
प्रतिनिधिसभा र राष्ट्रियसभा सदस्यको सपथ २० गते हुँदैछ ।

पूर्ववर्ती सरकारको निर्णय उल्ट्याउँदै वर्तमान सरकारले रामनारायण बिडारी, युवराज खतिवडा र विमला पौडेल राईलाई राष्ट्रिय सभा सदस्यमा सिफारिस गरेको थियो। सोही दिन राष्ट्रपतिले मनोनित गरेकी थिइन्।

यसअघिको पूर्ववर्ती सरकारले गोपाल बस्नेत, कृष्णप्रसाद पौडेल र चाँदनी जोशीको नाम सिफारिस गरेकोमा राष्ट्रपतिले मनोनित गरेकी थिइनन्।

शपथ रोक्न र आफूहरुलाई राष्ट्रियसभा सदस्य बनाउन माग गर्दै गोपालकुमार बस्नेत, कृष्णप्रसाद पौडेल र चाँदनी शर्माले दायर गरेको रिटको सुनुवाईमा सर्वोच्चले अल्पकालीन आदेश दिएको हो ।