काठमाडौं– रक्षामन्त्री ईश्वर पोखरेल चीन भ्रमणको क्रममा बिहिवार वुहान पुगेका छन् । त्यहा उनले ‘विश्व सैन्य खेलकुद’ प्रतियोगितामा विशेष अतिथीका हैसियतमा सहभागीता जनाउनेछन् ।

उपप्रधानमन्त्री समेत रहेका रक्षामन्त्रीले बेइजिङमा दुई दिनसम्म चल्ने जियांगशान फोरममा समेत सहभागीता जनाउने उनका प्रेस संयोजक लोकेन्द्र केसीले जानकारी दिएका छन् । उक्त सम्मेलनमा विश्वका धेरै देशका रक्षामन्त्री, राजनीतिज्ञ, सेनाका जनरल र सुरक्षाविदहरुको सहभागीता रहनेछ ।  रक्षामन्त्री पोखरेल उक्त सम्मेलनमा सहभागी भएर कार्तिक ६ मा स्वदेश फर्कने रक्षामन्त्रालयले जनाएको छ ।

कार्यक्रममा नेशनल पिपुल्स कांग्रेसका अध्यक्ष ली झांगसु र स्टेट काउन्सिलर समेत रहेका रक्षामन्त्री वेई फेंगे समेत सहभागी रहनेछन् । फोरमको उद्घाटन चिनियां रक्षामन्त्री फेंगेले गर्ने कार्यक्रम छ ।

फोरमलाई रक्षामन्त्री पोखरेलले  साना र मध्यम देशहरुको साझा सुरक्षा चांसो विषयमा आफ्नो धारणा राख्नेछन् । त्यसका साथै उनले आफ्ना चिनियां समकक्षी फेंगेसंग द्धिपक्षिय भेटवार्ता गर्ने र रक्षासम्बन्धी सहयोगमा हस्ताक्षर गर्ने तयारी छ । 

सरकारका प्रवक्ता समेत रहेका संचारमन्त्री गोकुल बांस्कोटाले चीनसंग सैनिक सहायतासम्बन्धी सम्झौतामा हस्ताक्षर गर्न मन्त्रिपरिषद वैठकले उपप्रधानमन्त्री पोखरेललाई अधिकार दिइएको जानकारी दिए । उनले चिनियां राष्ट्रपति सी जिनपिङको नेपाल भ्रमण हुंदा भएको सहमतिअनुसार नै सहयोगमा हस्ताक्षर हुने बताए । मन्त्री बांस्कोटकाअनुसार १ सय ५० मिलियन आरएमबी सहयोगसम्बन्धी सम्झौतामा हस्ताक्षर हुनेछ ।

सेनाले उक्त सहयोग शान्तिकार्य, दैविक प्रकोप उद्दार र मानविय सहायतामा खर्च गर्ने तयारी गरेको छ । सरकारले शान्ति सेनामा १० हजार सैनिक पठाउने गरी तयारी थालेको थियो । त्यसका लागी आवश्यक पर्ने सामान चीनले सेनाको आग्रहमा उपलव्ध गराउंनेछ ।

प्रधानसेनापति पूर्णचन्द्र थापा चीन भ्रमणमा जांदा समेत चीनले १ सय ५० मिलियन आरएमबी दिने घोषणा गरेको थियो ।

यस्तो छ बेइजिङ जियांगशान फोरमको महत्व

जियांगशान फोरम चीनको एसोसियशन अफ मिलिट्री साइन्सले २००६ मा एसिया प्रसान्त सुरक्षा संवादको लागी ट्रयाक २ मंचका रुपमा अघि बढाएको थियो  । प्रत्येक दुई वर्षमा आयोजना हुने उक्त फोरम गत वर्षबाट भने प्रत्येक एक वर्षमा हुन् थालेको हो ।

यो फोरमलाई २०१४ बाट ट्रयाक १.५ का रुपमा विकसित गरिएको हो । त्यसपछि यसमा रक्षा र सैन्य क्षेत्रका अधिकारी, अन्र्तराष्ट्रिय संगठनका प्रमुख, पूर्व राजनीतिक अधिकारी र सेवानिवृत जनरलका साथ साथै एसिया बाहिर र भित्रका प्रसिद्ध विद्धानहरुलाई सहभागी गराउन सुरु गरिएको थियो ।

चीनले पछिल्ला दिनमा जियांगशान फोरमलाई एक उच्चस्तरीय सुरक्षा तथा रक्षा मंचको रुपमा विकसित गरेको छ । यो फोरममा एशिया प्रशान्त क्षेत्रमा नयां गतिशीलता, नयां अवसर र नयां चुनौतीको बारेमा छलफल केन्द्रित हुनेछ ।

चीनले फोरमले आपसी सहयोग बढायने, सुरक्षा संवाद र रक्षा सम्पर्क बढाउने र क्षेत्रीय शान्ती र स्थिरतामा बढवा दिनको लागी भुमिका खेल्ने दावी गरेको छ ।