काठमाडौं– अभिषेक गिरी विराटनगरका कुख्यात गुण्डा नाइके हुन् ।
एमालेका पर्शुराम बस्नेत र गिरी समूहको ‘दादागिरी’ का कारण कुनै बेला विराटनगर अशान्त थियो ।
अपहरण र शरीर बन्धक मुद्धामा ९ वर्ष जेल बसेर छुटेका उनी पछिल्लो समय काँग्रेस राजनीतिमा सक्रिय थिए ।
उनै गिरीलाई प्रहरीले मोरङ कारागारका कैदी/बन्दीको रासन र भत्ताको रकम घोटाला गरेको अभियोगमा शनिबार बिहान विराटनगर–४ मधुमारास्थित निवासबाटै पक्राउ गरेको छ ।
प्रहरीले सुरुमा अवैध हतियार राखेको सूचना आएको भन्दै गिरी निवासको खानतलासी गरेको थियो ।
मोरङ प्रहरी प्रमुख एसपी कबित कटवालले कारागारका कैदी÷बन्दीलाई आउने रकम गिरीले हिनामिना गरेको उजुरीका आधारमा पक्राउ गरिएको बताए ।
‘कारागारका कैदी/बन्दीलाई प्राप्त हुने भत्तालगायतको रकम लगेको उजुरी परेको थियो’, कटवालले भने, ‘केही तथ्य पनि भेटिएका छन् । हामी थप अनुसन्धान गर्दैछौं ।’
गिरी अपरहण मुद्धामा जेल भुक्तानीको सिलसिलामा लामो समय मोरङ कारागार बसेका थिए । कैद भुक्तानीपछि पनि उनले जेलको भित्री प्रशासन चलाउँदै आएको चर्चा थियो । जेलभित्र हुँदा उनी चौकीदार थिए ।
शेखर कोइरालाका प्रिय छन् गिरी
गिरीसहित उनको समूहका १ सय ५० जनालाई २८ मंसिर, २०८३ मा काँग्रेस पार्टी प्रवेश गरेका थिए ।
विराटनगरमा आयोजित पार्टी प्रवेश कार्यक्रममा काँग्रेस नेताहरुले गिरीको प्रवेशलाई काँग्रेसप्रति युवाको आकर्षण बढेको रुपमा व्याख्या गरेका थिए ।
उनीहरुले गिरीको आगमनले मोरङमा काँग्रेस बलियो हुने दाबी गरेका थिए । गिरी नेता शेखर कोइरालासँग निकट मानिन्छन् ।
गिरीलाई कारागार सरुवा गर्न काँग्रेसले दिएको थियो दबाब
कारागारबाटै गुण्डागर्दी ‘ग्याङ’ सञ्चालन गरेपछि गिरीलाई ०७४ सालमा मोरङ जिल्ला कारागारबाट डिल्ली बजार कारागार सरुवा गरिएको थियो ।
चौकीदारको भूमिकामा रहेका गिरीले कारागारमा आफू इतर कैदी/बन्दीमाथि कुटपिट र यातना दिने तथा रकम असुली गर्ने गर्थे ।
सोही विषयमा सार्वजनिक सञ्चार माध्यममा समाचार आएपछि २३ चैत २०७४ मा उनलाई डिल्लीबजार कारागार सरुवा गरियो ।
काँग्रेस सरकारमा आएपछि नेताहरुको दबाबमा गिरीलाई २०७८ भदौमा कारागार व्यवस्थापन विभागले फेरि मोरङ कारागार सरुवा गर्ने निर्णय गरेको थियो ।
१७ भदौ २०७८ मा कारागार स्थानान्तरणको निर्णय भयो । गिरीलाई डिल्ली बजारबाट १६ कात्तिक २०७८ मा मोरङ कारागार लगियो । तर, आफूहरु असुरक्षित हुने भन्दै कैदी÷बन्दी प्रदर्शनमा उत्रिए ।
कैदी/बन्दी मात्र होइन, उनीहरुका आफन्तहरुले समेत मोरङ कारागारको गेटमा ठूलो संख्यामा जम्मा भएर प्रदर्शन गरे ।
केही समय सप्तरी कारागार राखेर उनलाई दुई सातापछि पुनः मोरङ नै लगियो ।
मोरङ कारागारमा प्रवेशमा रोक लगाउन माग गर्दै प्रदर्शनमा उत्रिएका कैदी/बन्दीमाथि गिरीले कैदी/बन्दीकै आफू पक्षधर समूह परिचालन गरी कुटाए ।
२४ कात्तिक ०७८ मा गिरीले योजनाबद्ध रुपमा मोरङ कारागारमा झडप गराए ।
त्यस क्रममा गिरीको विरोधमा रहेका चौकीदार किरण गुरुङसहित ६ जना घाइते भए ।
त्यसपछि काँग्रेस नेताहरुकै दबाबमा रातारात चौकीदार गुरुङसहित १४ कैदीलाई झुम्कासहित झापा र इलाम कारागार सरुवा गरिएको थियो ।
तर, गिरी पक्षका भने कोही पनि सरुवा भएनन् ।
कारागारमा दुई समूहबीच पटकपटक झडप मात्र भएन, गिरीलाई कारागार सरुवा गर्न दबाब दिँदै विराटनगर महानगर समितिका सह–सचिव सचिन पोखरेलको नेतृत्वमा काँग्रेसले कारागारबाहिर प्रदर्शन नै गरेको थियो ।
कारागारभित्र भएको दुई समूहको झडपमा गिरी पक्षधर कैदी गोपाल शर्माको मृत्यु भयो ।
पक्राउ पर्नुअघि शर्मा नेपाल ट्रेड युनियन काँग्रेस, मोरङका अध्यक्ष थिए । बहुमत कैदी/बन्दीले गिरीलाई मोरङ कारागारमा नल्याउन माग गर्दै लिखित निवेदन पनि दिए ।
अन्ततः काँग्रेस नेताहरुको दबाबमा कारागार प्रशासनले उनलाई सप्तरीबाट मोरङ ल्यायो ।
यतिसम्मकी गिरीलाई चौकीदारको जिम्मेवारी दिन कारागार प्रशासनले चौकीदार नवीन राईलाई झुम्का कारागार स्थानान्तरण गरेको थियो ।
प्रतिक्रिया