काठमाण्डु – गौरबाट काठमाण्डु गइरहेको बस भरतपुर महानगरपालिका–९ टिकौली जङ्गलमा दुर्घटना हुँदा ३३ जना घाइते भएका छन् ।

भरतपुरको टिकौली जङ्गलमा रोकिराखेको ट्रकमा दुईवटा बस ठोक्किँदा ३३ जना घाइते भएका हुन् ।

गएराति इँट्टा भरेर पार्किङ गरिराखेको ना ६ ख ८१३ नम्बरको ट्रकमा गौरबाट काठमाण्डुको लागि छुटेको बा. प्र. ०३०० ख ०१२३ नम्बरको डल्फिन बस र सोही बसमा जनकपुरबाट काठमाण्डुको लागि छुटेको बा. प्र.०३०० ख ३९०२ नम्बरको रुद्राक्ष बस अर्को बस समेत ठोक्किएको थियो ।

दुर्घटना लगत्तै सशस्त्र प्रहरी बल, नेपाल नं. १७ गण आँपटारी चितवनबाट खटिएको टोलीले घाइतेहरुलाई उद्धार गरी उपचारका लागि अस्पताल पठाएको थियो ।

घाइतेहरुमध्ये चितवन मेडिकल कलेजमा १५ जना, नेशनल सिटी अस्पतालमा १३ जना र भरतपुर अस्पतालमा पाँच जनाको उपचार भइरहेको छ । दुर्घटनापछि केही समय अवरुद्ध भएको सडक सञ्चालनमा आएको छ ।