स्थानीय निर्वाचन सारिए एमालेलाई मान्य हुँदैन : पूर्व महान्यायाधिवक्ता खरेल

झापा – नेकपा एमालेको स्थायी समिति सदस्य एवं पूर्वकानुनमन्त्री अग्नी खरेलले स्थानीय तहको निर्वाचन सारिए एमालेलाई मान्य नहुने बताएका छन् ।

आज झापाको विर्तामोडमा आयोजित पत्रकार भेटघाट कार्यक्रममा बोल्दै उनले यदि संविधान उल्लङ्घन गरेर स्थानीय तहको चुनाव सार्ने कार्य भएमा एमालेले नसहने बताएका हुन् । उनले भने ‘वैशाखमा हुनुपर्ने चुनाव मङ्सिरमा सार्न मिल्दैन । यो स्थानीय निकाय होइन, स्थानीय सरकार हो । संविधानमा यसको अवधि पाँच वर्ष हुने स्पष्ट व्यवस्था छ ।’

चुनाव नगर्ने र विगतको जस्तै जनप्रतिनिधिविहीन अन्योलको अवस्थामा स्थानीय तहलाई धकेल्न सरकार उद्यत रहेको उनको आरोप थियो । स्थानीय तहमा पाँच वर्ष तोकिएको अवधि एकदिन पनि बढाउन नमिल्ने र एक दिन जनप्रतिनिधिविहीन पनि राख्न नमिल्ने उनको धारणा छ ।

‘अर्ली इलेक्सन’ वा तीनवटै तहको सरकारको चुनाव एकैपटक गर्ने भन्ने कुरा चुनाव नगर्ने योजना भएको एमाले नेता खरेलको आरोप छ ।