काठमाण्डु– स्विट्जरल्यान्डको जुरिच विमानस्थलमा अल्कोहल परीक्षणमा असफल भएपछि एयर इन्डियाका एक सहपाइलट निलम्बनमा परेका छन्। उनी सेप्टेम्बर ६ मा जुरिचबाट दिल्लीका लागि उडान भर्न लागेको एयर इन्डियाको उडान नम्बर एआई १५१ सञ्चालन गर्ने तयारीमा थिए।

एयर इन्डियाका अनुसार उडानअघि एक कर्मचारीले सहपाइलटको अवस्था शंकास्पद देखेपछि तत्काल सम्बन्धित अधिकारीलाई जानकारी गराएका थिए। त्यसपछि स्थानीय अधिकारीहरूले गरेको प्रारम्भिक ब्रेथ एनालाइजर परीक्षणमा उनको शरीरमा अल्कोहल रहेको संकेत देखिएको थियो।

परीक्षणमा अल्कोहलको संकेत देखिएपछि सहपाइलटलाई तत्काल उडान सञ्चालनको जिम्मेवारीबाट हटाइएको थियो। त्यसपछि थप चिकित्सकीय परीक्षणका लागि पठाइएको र पछि उनलाई यात्रुका रूपमा भारत फर्काइएको एयर इन्डियाले जनाएको छ।

एयर इन्डियाका अनुसार अन्तिम चिकित्सकीय प्रतिवेदन र अनुसन्धान पूरा नभएसम्म सहपाइलट निलम्बनमा रहनेछन्। अन्तिम प्रतिवेदन र अनुसन्धानको निष्कर्षका आधारमा थप अनुशासनात्मक कारबाहीबारे निर्णय गरिनेछ।

उडान एआई १५१ पनि प्रभावित

सहपाइलटमाथि भएको कारबाहीका कारण जुरिचबाट दिल्लीका लागि तय गरिएको एआई १५१ उडानसमेत प्रभावित भएको थियो। उक्त उडान निर्धारित समयअनुसार सञ्चालन हुन नसकी भोलिपल्ट दिल्ली पुगेको जनाइएको छ।

मदिरा तथा प्रतिबन्धित पदार्थमा ‘शून्य सहनशीलता’

घटनापछि एयर इन्डियाले आफ्ना सबै पाइलटलाई मदिरा तथा प्रतिबन्धित पदार्थसम्बन्धी नियममा ‘शून्य सहनशीलता’ नीति रहेको पुनः स्मरण गराएको छ।

एयर इन्डियाको उडान सञ्चालन विभागका प्रमुखले यस विषयमा पाइलटहरूलाई जानकारी गराउँदै नियम तथा सुरक्षा प्रोटोकलको पूर्ण पालना गर्न निर्देशन दिएका छन्।

एयर इन्डियाले चालक दलका सदस्यसँग प्रत्यक्ष संवादका लागि साप्ताहिक ‘क्रु कनेक्ट’ कार्यक्रम पनि सञ्चालन गरिरहेको जनाएको छ। त्यस्तै, स्वास्थ्य, कल्याण, निर्णय क्षमता र व्यावसायिक जिम्मेवारीलगायत विषयमा विभिन्न विमानको फ्लीटका आधारमा छुट्टाछुट्टै प्रशिक्षण तथा छलफल भइरहेको छ।

सुरक्षा मापदण्डमा थप निगरानी

एयर इन्डियाका अनुसार पाइलटहरूका लागि नियमित अनुपालनसम्बन्धी तालिम र अनिवार्य ई–लर्निङ कार्यक्रम सञ्चालन हुँदै आएका छन्। साथै, पदार्थ दुरुपयोगसम्बन्धी नियम (Substance Abuse Regulations) र उड्डयन सुरक्षा प्रोटोकलबारे सचेतना अभिवृद्धिमा पनि जोड दिइएको छ।

उडान चालक दलका सदस्यका लागि मनोप्रभावकारी पदार्थसम्बन्धी अनिवार्य परीक्षणसमेत लागू गरिएको एयर इन्डियाले जनाएको छ। कम्पनीले आफ्नो सेफ्टी म्यानेजमेन्ट सिस्टम मार्फत यस्ता विषयको निगरानी गरिरहेको बताएको छ।

सहपाइलटमाथिको घटनामा भने अन्तिम चिकित्सकीय प्रतिवेदन र अनुसन्धानको निष्कर्ष आएपछि मात्रै थप कारबाहीबारे निर्णय हुने एयर इन्डियाले स्पष्ट पारेको छ।