काठमाडौं- नेपाली सेना र  अमेरिकी सेनाबीच ल्याण्ड फोर्स टल्क संचालन भएको छ ।  सैनिक मुख्यालयमा दुई दिनसम्म चल्ने यो कार्यक्रम ल्याण्ड फोर्स टल्क दोस्रो संस्करण हो ।

उक्त कार्यक्रममा अमेरिकी सेनाको प्यासेफिक कमाण्डका १६ जना अधिकृतहरु सहभागी छन् भने नेपाली सेनाबाट रथीबृन्दसहित १९ जना सहभागी छन् ।

नेपाली सनाले कार्यक्रमको उद्देश्य  सेनाको शान्ति स्थापना कार्यको क्षमता अभिबृद्धि, मानवीय सहयोग र विपद् प्रतिकार्य, फौज व्यवसायिकरणमा सहयोग तथा नेपाली सेना र अमेरिकी सेनाले संचालन गर्दै आइरहेको सैनिक कारवाहीका अनुभवहरु आदान प्रदान गर्नु रहेको जनाएको छ ।

टोलीको नेतृत्व गर्दै आएका अमेरिकी सेनाका दुई तारे जर्नेल डानियल एफ एमसीडानियलले आजै प्रधानसेनापति पूर्णचन्द्र थापासंग भेटवार्ता गरेका छन् । भेटवार्ताको क्रममा दुई देश बीचका सेनाको पारस्परिक सम्बन्ध र पेशागत क्षमता अभिवृद्धि गर्ने विषयमा छलफल भएको सैनिक जनसम्र्पक निर्देशनालयले जनाएको छ ।

भेटमा दई देशबीचको सैन्य सहकार्य र सहयोगको विषयमा समेत छलफल भएको थियो ।यसप्रकारका कार्यक्रमहरुले दुई देशका सेनाबीच रहंदै आएको सैनिक सम्बन्ध अझ प्रगाढ हुने र नेपाली सेनाको पेशागत क्षमतामा अभिवृद्धि हुने विश्वास सेनाले लिएको छ ।