काठमाडौं – संयुक्त राष्ट्र संघको सुडान मिसनमा निधन भएका नेपाली सेनाका प्रमुख सेनानी(लेफटिनेन्ट कर्णेल) रिदेश विष्टको दाहसंस्कार गरिएको छ ।

श्री एयरलायन्सको जहाजले सुडानबाट आज काठमाडौं शव लिएर आएको थियो । विष्टको आइतबार बिहान पशुपति आर्यघाटमा दाहसंस्कार भएको हो । विष्टको अन्त्येष्टीमा नेपाली सेनाले सलामी दिएको थियो ।

प्रमुख सेनानी (लेफटिनेन्ट कर्णेल) रिदेश विष्टको हृदयघातबाट निधन भएको थियो । उनी ९ महिना अघि सुडान मिशन मुख्यालयमा ‘स्टाफ अफिसर’ का रूपमा खटिएका थिए । उनको सुडानस्थीत मिसन मुख्यालय जालिङ्गीमा मृत्यु भएको हो ।

सुडान पुग्न नेपाल हुदै उड्नुपर्ने मुलुकहरु भारत, पाकिस्तान, मस्कट, साउदी अरब र सुडानका लागि परराष्ट्र मन्त्रालयले ओभर फ्लाइङ रुट अनुमति लिइदिएपछि नेपाली सेनाले निजी वायुयान कम्पनी श्रीको सीआरजे बमबार्डियर विमानलाई चार्टर गरेर पठाएको थियो ।

यो चार्टर उडानको खर्च संयुक्त राष्ट्र संघले बेहोर्ने सैनिक प्रवक्ता विज्ञानदेव पाण्डेले जानकारी दिए । सैनिक मुख्यालय जंगी अड्डाको शिकायत जाँच निर्देशनालयमा दरबन्दी भएका विष्ट सानेपाका स्थायी बासिन्दा हुन् ।