काठमाण्डु- बाबुराम भट्टराई नेतृत्वको नेपाल समाजवादी पार्टी (नेसपा) को बैठक बसेर मंसिर ४ गते सम्पन्न निर्वाचनको समीक्षा भएको छ ।

शुक्रबार पार्टी कार्यालयमा बैठक बसेर निर्वाचनसम्बन्धी सबै विषयलाई केन्द्रमा राखेर छलफल भएको पार्टीका संघीय परिषद् अध्यक्ष महिन्द्र राय यादवले जानकारी दिए ।

‘आज संघीय निर्वाचनको विषयमा समीक्षा गरिएको छ । यसरी नै प्रदेश र जिल्लामा समेत समीक्षा गर्छौँ’, यादवले भने । उनले चुनावमा सोचेजस्तो नतिजा नआएको भन्दै अब फरक ढंगले सोच्नुपर्ने अवस्था आएको बताए । उनले सरकारमा सहभागिता र माओवादीसँग पार्टी एकताका विषयमा भने आजको बैठकमा कुनै छलफल नभएको बताए ।

नेपाल समाजवादी पार्टीका उम्मेदवार यो चुनावमा माओवादी केन्द्रको चुनाव चिन्ह हसिया हथौडा लिएर उठेका थिए । जसमा प्रतिनिधि सभामा महिन्द्र राय यादव तथा प्रदेश सभामा गंगानारायण श्रेष्ठ र फणीन्द्र देवकोटा मात्रै निर्वाचित भएका थिए ।