काठमाण्डु – ग्लोबल आईएमई बैंकको प्रायोजनमा सिस्नुपानी नेपालले संयुक्त अरब इमिरेट्स (यूएई) मा ‘दुई थोपा हाँसो’ कार्यक्रम सम्पन्न गरेको छ ।

नयाँ वर्ष २०२५ को अवसरमा यूएईमा बसोबास गरेका श्रमशील नेपाली नागरिकलाई मनोरञ्जन, वित्तीय सचेतना अभिवृद्धि एवं जीवनबारे सकारात्मक भावना अभिवृद्धि गर्ने उद्देश्यले निःशुल्क रूपमा कार्यक्रम गरिएको हो ।

नेपाली राजदूतावास अबुधाबीको संयोजनमा गैरआवासीय नेपाली संघ यूएईको आयोजनामा सिस्नुपानी नेपालका कलाकारहरूको प्रस्तुति थियो ।

यूएईका लागि नेपाली राजदूत महामहिम तेजबहादुर क्षेत्रीको प्रमुख आतिथ्यमा उद्घाटन गरिएको कार्यक्रम आबुधाबीस्थित अलजोधा, एम ४४, मुसफ्फाबाट जनवरी १० तारिखमा सुरु गरिएको थियो ।

यसैगरी क्लिन्को क्याम्प, सज्जा सारजहाँ र अलकुजको बलेदिया भलिबल ग्राउन्डमा ११ जनवरीमा गरिएको थियो । १२ जनवरीमा भने इभर सेन्डाई क्याम्प, सोनापुर र इन्डियन सोसल सेन्टर अजमानमा सम्पन्न भएको थियो ।

कार्यक्रममा सिस्नुपानी नेपालका तर्फबाट कार्यक्रम संयोजक तथा सिस्नुपानी नेपालका महासचिव टंक आचार्य, चर्चित हास्य व्यंग्य कलाकार मनोज गजुरेल, गायक धीरेन्द्र पे्रमर्षि, कलाकार चक्र दवाडी र सरोज घिमिरेको उपस्थिति थियो ।

कलाकार मनोज गजुरेल र चक्र दवाडीले मदन भण्डारी र बीपी कोइरालाको भूमिका निर्वाह गर्दा दर्शकमा निकै रमाइलो छाएको थियो । टंक आचार्यले आफ्नो र अध्यक्ष लक्ष्मण गाम्नागेको कविता सुनाएर परदेशिएका नेपालीलाई भावुक बनाएका थिए । धीरेन्द्र पे्रमर्षिको प्यारोडी गीतले सबैलाई रमाइलो प्रदान गरेको थियो भने सरोज घिमिरेको मन्तव्यले दर्शकलाई उत्साह थपेको थियो ।

राजदूतावासबाट प्रतिनिधित्व गर्दै दिपेन्द्र पौडेल र विकास भट्टराईले नेपालीले ध्यान दिनुपर्ने कुरामा चर्चा गरेका थिए । स्थानीय कलाकारको पनि उपस्थितिले कार्यक्रम निकै रमाइलो भएको थियो ।

गैरआवासीय नेपाली संघ यूएईका अध्यक्ष विकाश शाहीको अध्यक्षतामा सम्पन्न कार्यक्रमहरूमा गैरआवासीय नेपाली संघका निवर्तमान अध्यक्ष एवं संरक्षक ठाकुरप्रसाद ढुंगाना, गैरआवासीय नेपाली संघ मध्यपूर्वका उपसंयोजक तथा गैरआवासीय नेपाली संघ यूएईका पूर्वअध्यक्ष रमेश श्रेष्ठ लगायत धेरै सरोकारवाला संस्थाका प्रतिनिधिको पनि उपस्थिति थियो ।

नेपाली कामदारलाई पायक पर्ने हल तथा उनीहरू बस्ने क्याम्प क्याम्पमा नै पुगेर गरिएको कार्यक्रमले आर्थिक, सामाजिक तथा कानूनी कुरामा समेत सचेतना थपेको थियो । नेपाली रेमिट्यान्समा उल्लेख्य भूमिका निर्वाह गर्ने श्रमशील नेपालीका दुःखसुखमा ऊर्जा थप्ने उद्देश्यले सिस्नुपानी नेपालले विगत ११ वर्षदेखि ‘दुई थोपा हाँसो’ कार्यक्रम गर्दै आएको छ । यूएईमा भने यो चौथो संस्करण हो ।

ग्लोबल आईएमई बैंकको ग्लोबल रेमिटको मुख्य प्रायोजन रहेको कार्यक्रममा नेपाल वायुसेवा लगायत अन्य दर्जनौं संस्थाको प्रायोजन रहेको थियो ।

आगामी दिनमा पनि यस्ता कार्यक्रम नेपालीले श्रम गरिरहेका विभिन्न देशमा गर्दै जाने कुरा आयोजक संस्था र कलाकार समूहद्वारा व्यक्त गरिएको थियो ।