न्यूयोर्क– नेपालले ‘हिमाली मुलुकहरुको मित्रवत समूह’लाई ओपचारीक मान्यता दिन राष्ट्रसंघलाई आग्रह गरेको छ । मित्रवत समुह जलवायु परिवर्तनको प्रत्यक्ष असर देखिने हिमाली क्षेत्र र हिमाल जोडिएका राष्ट्रहरुको समुह हो । वन तथा वातावरणमन्त्री शक्ति बहादुर बस्नेतले साइड लाइन बैठकमा हिमाली मुलुक जोडिएको राजनीतिक संयन्त्र अपरिहार्य देखिएको धारणा राखेका हुन् ।  

उक्त समूहको बैठकमा बोल्दै वन तथा वातावरण मन्त्री बस्नेतले हिमाली क्षेत्रको बचाउका लागी साझा आवाजको आवश्यकता रहेको औंल्याए । उनले हिमालयन ग्लेसियर पग्लने, पर्यावरणीय स्वास्थ्य असन्तुलित हुने र सबैभन्दा बढी स्थानीय बासिन्दा प्रभावित हुने भन्दै सम्वद्ध मुलुकहरुको ध्यानआकर्षण समेत गराए । 

आफुले साझां आवाजको पक्षमा दबाव सिर्जना गर्न जरुरी रहेको भन्दै राष्ट्रसंघले औपचारिक मान्यता दिनुपर्छ भनेर साइडलाइन बैठकमा धारणा राखेको मन्त्री वस्नेतले बताए । उनले  पर्यावरण र जलवायु परिवर्तनको ग्लोबल सरोकारमा जोडिएर नेपालले २०२० को अप्रिलमा नेपालमा अन्तर्रा्ष्ट्रियस्तरको सगरमाथा डाइलगको आयोजना गर्न लागेको जानकारी समेत उक्त बैठकमा गराएका थिए । 

नेपालसहित हिन्दु कुश क्षेत्रका पहाडसहित यस्ता २ दर्जनभन्दा बढी मुलुकहरु अहिलेको यो मित्रवत समूहमा जोडिएका छन् । 

मन्त्री बस्नेतले जलवायु परिवर्तनको प्रभावबाट साना तथा गरिब मुलुकहरु बढी प्रभावित रहने बताएका थिए । उनले नेपालमा प्रभावकारी संरक्षणको नमुना बनेको सामुदायिक वनको अवधारणालाई विश्व समुदायले आत्मसात गर्नुपर्ने सुझाव दिए  । 

नेपालले प्रकृतिमा आधारित समाधानको प्रयासलाई जारी राखेको जानकारी दिंदै मन्त्री बस्नेतले यो वर्षलाई राष्ट्रिय वृक्षारोपण वर्षका रुपमा सरकारले मनाईरहेको बताए ।