काठमाण्डु– नेकपा माओवादीका महासचिव नेत्रविक्रम चन्द विप्लवले सर्वपक्षीय सरकार गठन नभए सडक संघर्षमा जाने चेतावनी दिएका छन्।

बिहीबार नवौँ केन्द्रीय समितिको चौथौँ विशेष बैठकलाई सम्बोधन गर्दै १० दिनभित्र आफूहरूले अघि सारेको १३ बुँदे माग सम्बोधन नभए शान्तिपूर्ण आन्दोलन गर्ने बताएका हुन् ।

उनले भने, ‘हामी १० दिन कुर्नेछौँ, यदि बेवास्ता गरियो भने जनता र जेनजीको समर्थनमा आन्दोलन सुरु गर्नेछौँ।हामी समाजवादी सङ्घीयता को पक्षमा छौँ र सबै नागरिकले राज्यमा स्वामित्व महसुस गर्ने गरी राज्य संरचना पुनःसंरचना हुनुपर्छ।’

उनले अन्तरिम कालको नेतृत्व नेकपा (माओवादी) लाई दिए आन्दोलनकारी, जनता सबैलाई चित्त बुझ्दोगरी राज्यलाई निकास दिने बताएका छन्।

‘यो अन्तरिम कालको नेतृत्व नेकपा (माओवादी) लाई दिइन्छ भने पनि हामी सबै शक्तिलाई आन्दोलनकारी, जनता सबैलाई चित्त बुझ्दोगरी राज्यलाई निकास दिनेगरी पहल गर्दछौँ,’ उनले भने, ‘राजनीतिक शक्तिहरूको सहमतिबाट उपयुक्त निकास निकाल्नुपर्छ। अहिलेसम्म अपूर्ण रहेका कानूनी, राजनीतिक, प्रशासनिक सबै क्षेत्रका समस्यालाई सम्बोधन गरेर देशलाई चुनावतिर लैजानुपर्छ।’