झापा – नेत्रविक्रम चन्द नेतृत्वको नेपाल कम्युनिष्ट पार्टीले कोरोना भाइरसको संक्रमण रोकथाम तथा नियन्त्रणमा भएको खर्च विवरण सार्वजनिक गर्न माग गरेको छ ।

सोमबार जिल्ला सेक्रेटरी श्रीजंगले एक विज्ञप्ति जारी गर्दै झापाका सबै स्थानीय तहलाई खर्च विवरण सार्वजनिक गर्न आग्रह गरेका हुन् ।

‘झापाका स्थानीय तहहरुले करोडौं खर्च गरेका छन् । जसको कुनै हिसाबकिताब छैन् । र व्यवहारत कोरोना व्यवस्थापनको विषय भ्रष्टाचार गर्ने माध्यम बन्न पुगेको छ । कोरोना उपचार र व्यवस्थापनमा भएको खर्चको हिसाबकिताब सबै स्थानीय तहमार्फत तीन दिनभित्रमा सार्वजनिक गरियोस्’, विज्ञप्तिमा भनिएको छ ।

त्यस्तै उनले निजी र सामूदायिक शिक्षण संस्थाहरुले शुल्क तिर्न अविभावकहरुलाई ताकेता गरेको भन्दै शुल्क नमाग्न पनि आग्रह गरेका छन् ।

‘निजी शिक्षण संस्थाहरुलाई सरकारी लुटेरा जनप्रतिनिधिहरुले साथ दिएर जनताको ढाड सेक्ने काम गर्न खोजिरहेका छन्, यो तुरुन्त बन्द गरियोस्’, विज्ञप्तिमा भनिएको छ ।

साथै विज्ञप्तिमा बैंक तथा लघुबित्तको किस्ता र ब्याज नतिर्न पनि आग्रह गरिएको छ ।

‘लघुबित्तहरुले मध्यमवर्गीय गुजारामुखी व्यवसायीहरुलाई किस्ता र ब्याजको ताकेता गरेर चर्को समस्या पैदा गरेको हुनाले यो काम तुरुन्त बन्दगरियोस् ’, विज्ञप्तिमा भनिएको छ ।

नेकपाले तत्काल हिसाब सार्वजनिक गर्न र जनतालाई दुःख नदिन पनि आग्रह गरेको छ । जनतालाई दुःख दिए कडा कारबाही गर्ने चेतावनी विज्ञप्तिमार्फत दिइएको छ ।