काठमाण्डु – भारतमा हैदराबादबाट बेंगलुरु जाँदै गरेको यात्रु बसमा आगलागी हुँदा कम्तीमा १० जनाको मृत्यु भएको छ ।

आगोमा परेर धेरै जना गम्भीर घाइते भएका छन्। शुक्रबार बिहान कुर्नूल जिल्लाको चिन्ना टेकुरु गाउँ नजिकै बसमा आगो लागेको थियो । आगो लागेर बस पूर्ण रूपमा जलेको छ ।

दुर्घटना हुँदा बसमा लगभग ४२ जना यात्रु थिए। घाइतेमध्ये केहीको अवस्था गम्भीर रहेको बताइएको छ । त्यसैले मृत्यु हुनेको संख्या बढ्न सक्ने आशंका गरिएको छ।

प्रारम्भिक जानकारी अनुसार एउटा मोटरसाइकल बससँग ठोक्किएको । बसको मुनि मोटरसाइकल पस्दा बसको तेलको ट्याङ्कीमा ठोक्किएको थियो, जसका कारण आगो लागेको थियो। यद्यपि, स्थानीय प्रशासनले अहिलेसम्म यो कारणको आधिकारिक पुष्टि गरेको छैन।

दुर्घटनामा दुई बालबालिका र दुई चालक सहित लगभग १९ यात्रुहरू सुरक्षित छन् । प्रहरीका अनुसार सर्ट सर्किट भएर बसको ढोका जाम भयो र केही मिनेटमै गाडी पूर्ण रूपमा आगोमा जल्यो। बाँचेका धेरैजसो यात्रुहरू २५ देखि ३५ वर्ष उमेरका रहेको बताइएको छ।