काठमाण्डु– बेनिघाट बस दुर्घटनामा घाइते भएकालाई भेट्न गृहमन्त्री ओमप्रकाश अर्याल अस्पताल पुगेका छन् । गृहमन्त्री अर्याल सोमबार दिउँसो ट्रमा सेन्टर र नेपाल नेसनल अस्पतालमा उपचाररत घाइते भेट्न पुगेका हुन् ।

पृथ्वी राजमार्ग अन्तर्गत धादिङको बेनिघाट रोराङ गाउँपालिका–७ चरौंदी नजिकै गएराति ग २ ख १४२१ नम्बरको यात्रुबाहक बस दुर्घटनामा परेको थियो ।

त्रिशुलीमा खसेको बसमा सवार १८ जनाको घटनास्थलमै मृत्यु भएको थियो भने उपचारको क्रममा थप एक सहित १९ जनाको मृत्यु भएको थियो ।

बसमा चालकसहित ४४ जना सवार थिए । घाइते भएका २५ जनाको कलंकीस्थित नेपाल नेसनल अस्पताल, ट्रमा सेन्टर र धादिङस्थित शिक्षण अस्पतालमा उपचार भइरहेको छ ।

दुर्घटनाबारे गृह मन्त्रालयले छानबिन समिति गठन गर्ने निर्णय गरेको छ।