काठमाडौं – आज काठमाडौं उपत्यकासहित देशभरको तापक्रम घटेको छ । मौसम पूर्वानुमान महाशाखाले मंगलबार काठमाडौं उपत्यकाको तापक्रम ५ डिग्री रहेकोमा बुधबार बिहान ३ दशमलव ७ डिग्री सेल्सियसमा झरेको जनाएको छ ।

तापक्रम घट्दा उपत्यकामा साविकभन्दा बढी चिसो महशुस गरिएको छ । आजको तुलनामा भोली झनै चिसो बढ्ने मौसमविद् राजु प्रधानाङ्गले जानकारी दिए ।

पश्चिमी मौसमी प्रणाली सक्रिय रहेका कारण आजपनि उच्च पहाडी र हिमाली क्षेत्रमा हिमपात हुने सम्भावना छ । सुदुरपश्चिमका उच्च भूभागमा बढी हिमपात हुने महाशाखाले जनाएको छ ।

तराईका अधिकांश क्षेत्रमा बिहानैदेखि बाक्लो हुस्सु र कुहिरो लाग्दा जनजीवन प्रभावित बनेको छ । तर यो शीतलहर नभएको उनले बताए । उनका अनुसार लगातार ४८ घन्टासम्म बाक्लो हुस्सु र कुहिरो लाग्नुका साथै न्युनतम तापक्रम ४ देखि ५ डिग्री सेल्सियसमा झरेपछि मात्र तराइमा शीतलहर शुरु हुन्छ ।

यस्ताे छ तीन दिनको मौसम 

पौष २  गते (बुधबार)

दिउँसो: देशको पूर्वी  पहाडी भू-भागमा आंशिक बदली रही बाँकी भू-भागमा मौसम सामान्यतया सफा रहनेछ।

राती:  देशको  पूर्वी र पश्चिमी पहाडी भू-भागमा आंशिक बदली रही बाँकी भू-भागमा मौसम सामान्यतया सफा रहनेछ।

 पौष ३  गते (बिहीबार)

दिउँसो: देशको पश्चिमि भु-भाग लगायत पूर्वी  पहाडी भू-भागमा आंशिक बदली रही बाँकी भू-भागमा मौसम सामान्यतया सफा रहनेछ।

राती:  देशभर आंशिक बदली रहनेछ।

 पौष ४  गते (शुक्रबार)

दिउँसो: देशको पश्चिमि र मध्य भु-भाग लगायत पूर्वी  पहाडी भू-भागमा आंशिक देखि सामान्य वदली रही  बाँकी भू-भागमा आंशिक वदली रहनेछ। साथै पश्चिम भेगका एक दुइ स्थान मा हल्का वर्षा हुने सम्भावना छ ।

राती: देशभर आंशिक देखि सामान्य वदली रहने छ । साथै पश्चिम भेगका एक दुइ स्थानमा हल्का वर्षा हुने सम्भावना छ ।