काठमाण्डु – नेपाली कांग्रेस केन्द्रीय कार्यसमितिको बैठकले पार्टीको १५औं महाधिवेशनका लागि आवश्यक कार्यतालिका सर्वसम्मत रूपमा पारित गरेको छ ।

बैठकपछि पार्टीका प्रवक्ता डा.प्रकाशशरण महतले जानकारी दिँदै महाधिवेशन आगामी २०८२ पुस २६, २७ र २८ गते गर्ने निर्णय भएको बताए ।

उनका अनुसार बैठकले पार्टी संरचना सुदृढिकरण तथा महाधिवेशन तयारीका विषयमा विस्तृत छलफल गरेको थियो । महतले भने, ‘बैठकले लामो छलफलपछि १५औं महाधिवेशनका सन्दर्भमा महत्त्वपूर्ण निर्णयहरू गरेको छ । कांग्रेसको १५औं महाधिवेशन २०८२ पुस २६, २७ र २८ गते हुने गरी प्रस्तावित कार्यतालिका केन्द्रीय समितिमा पेश गरिएको थियो र त्यो सर्वसम्मत रूपमा अनुमोदन गरिएको छ ।’

बैठकले मंसिर २० गतेभित्रै पुराना तथा नयाँ क्रियाशील सदस्य वितरणको काम केन्द्रीय कार्यालयमार्फत सम्पन्न गर्ने निर्णय गरेको छ । पुस ८ गतेसम्म सबै निर्वाचन क्षेत्रमा क्रियाशील सदस्यता नवीकरण तथा नयाँ सदस्यता सम्बन्धी कार्य पूरा गर्ने निर्णय पनि गरिएको छ ।

कांग्रेसले महाधिवेशन तयारीलाई संगठन सुदृढीकरणसँग जोडेर आगामी दिनमा आवश्यक प्रक्रिया द्रूतगतिमा अघि बढाउने जनाएको छ ।

यस्तो छ महाधिवेशनको कार्यतालिका

नयाँ क्रियाशील सदस्य वितरण – मंसिर २० सम्म

नयाँ क्रियाशील सदस्यको फाराम पठाउने – मंसिर २४ सम्म

सबै निर्वाचन क्षेत्रमा नयाँ क्रियाशील सदस्यताको काम सक्ने – पुस ८ सम्म

नयाँ र नवीकरण गरिएका सदस्यता अन्तिम सूची बुझाउने – पुस १४

विदेशस्थित जनसम्पर्क समितिको अधिवेशन – पुस १५

गाउँ नगर र वडा अधिवेशन – पुस १६

गाउँ नगरपालिका अधिवेशन – पुस १७

प्रदेशसभा क्षेत्रीय अधिवेशन – पुस १९

प्रतिनिधिसभा क्षेत्रीय अधिवेशन – पुस २१

एकभन्दा बढी प्रतिनिधिसभा क्षेत्र भएको जिल्ला अधिवेशन – पुस २२

प्रदेश अधिवेशन – २३ र २४ गते ।

महाधिवेशन – पुस २६, २७ र २८ गते ।