काठमाण्डु – वरिष्ठ अधिवक्ता दिनेश त्रिपाठीलाई आक्रमण गरेको मुद्दामा काठमाण्डु जिल्ला अदालतले तीनै जना आरोपीलाई धरौटीमा रिहा गर्न आदेश दिएको छ ।

न्यायाधीश गायत्रीप्रसाद रेग्मीको इजलासले पक्राउ परेका तीनै जनालाई जनही १/१ लाख रुपैयाँ धरौटीमा रिहा गर्न आदेश दिएको छ ।

दोलखाको तामाकोशी गाउँपालिका–१ का ४८ वर्षीय ललितकुमार केसी र झापाको बुद्धशान्ति गाउँपालिका–४ घर भएकी ५५ वर्षीया सितल राई (सीतादेवी राई) धरौटी बुझाएर रिहा भएका छन् । धरौटी बुझाउन नसक्ने हुम्लाको अदानचुली गाउँपालिका–४ का ३२ वर्षीय महानन्द जैसी कारागार चलान भएका जनाइएको छ ।