काठमाण्डु– नेपाली कांग्रेसका उपसभापति एवं पूर्वमन्त्री धनराज गुरुङ विरुद्ध सीआईबीमा उजुरी परेको छ ।

ललितपुरस्थित मितेरी बचत तथा ऋण सहकारी संस्थाबाट उनले रकम अपचलन गरेको भन्दै प्रहरीको केन्द्रीय अनुसन्धान व्यूरो (सीआईबी) मा उजुरी परेको बताइएकाे छ ।

मितेरी बचत तथा सहकारी संस्थाकी तत्कालीन सञ्चालक ज्योति गुरुङ र धनराजको विरुद्धमा सहकारीका अध्यक्ष कुम्भराज गुरुङले सीआईबीमा उजुरी दिएका हुन् ।

यता सीआईबीले भने उनीविरुद्ध कुनै उजुरी नपरेको बताएको छ । ”सहकारीका उजुरी त आइरहेका छन् तर उहाँ (धनराज गुरुङ) नाम तोकीएर कुनै उजुरी हामीकहाँ आएको छैन” सीआईबीका प्रवक्ता प्रहरी उपरीक्षक होबिन्द्र बोगटीले काठमाण्डुपाटीलाई बताए ।

धनराज र ज्योति श्रीमान-श्रीमती हुन् । उनीहरुमाथि करिब १५ करोड रुपैयाँ अपचलन गरेको आरोप छ ।

कुम्भराज गुरुङले गत साता सहकारी वचत अपचलनसम्बन्धी छानबिन गर्न गठित संसदीय विशेष समितिमा गएर बयान समेत दिइसकेका छन् ।