जनकपुरधाम – धनुषाको कमला नगरपालिकामा भएको मस्जिद तोडफोड विवाद देशव्यापी चर्किरहेको बेला जनकपुरधाममा सर्वपक्षीय बैठक बसेर सद्भाव कायम गर्ने निर्णय गरिएको छ ।

मंगलबार धनुषाका प्रमुख जिल्ला अधिकारी (सीडीओ) प्रेमप्रसाद लुइँटेलको अध्यक्षतामा बसेको सर्वपक्षीय बैठकमा सामाजिक सद्भाव र एकता कायम गर्न सबै पक्षबाट आवश्यक समन्वय, सहयोग र द्वन्द्व न्यूनीकरणका लागि सक्रिय रूपमा लाग्ने निर्णय गरिएको छ ।

सद्भाव कायम राख्न सम्पूर्ण धर्म, समुदाय, राजनैतिक पार्टीहरूले आ–आफ्नो तर्फबाट प्रयास गर्दै कुनै पनि पक्ष वा व्यक्तिले धार्मिक, सामाजिक सद्भावमा खलल पुग्ने कुनै पनि गतिविधि नगर्ने/नगराउने निर्णय गरिएको धनुषाका सीडीओ लुइँटेलले जानकारी दिए ।

उनले मस्जिद तोडफोड र धार्मिक ग्रन्थ जलाउने कार्यमा संलग्नहरूलाई कानून बमोजिम कारवाही हुने प्रतिबद्धता जाहेर गरे । लुइँटेलले अपशब्द प्रयोग गरी हिन्दू धर्मप्रति टिप्पणी गरेर टिकटक भिडियो बनाउनेमाथि पनि कानून बमोजिम सजाय हुने बताए ।

उनले धनुषाबाट सुरु भएको दुवै समुदाय बिचको द्वन्द्व देशभर फैलिसकेकाले अब सबैलाई शान्त हुन आग्रह गरेका छन् ।