काठमाडौं – प्रमुख प्रतिपक्षी नेपाली कांग्रेसकी केन्द्रीय सदस्य डा. डिला संग्रौला पन्तले सरकारका प्रवक्तासमेत रहेका सञ्चार तथा सूचना प्रविधिमन्त्री गोकुलप्रसाद बाँस्कोटालाई तत्काल बर्खास्त गर्न माग गरेकी छन् ।

प्रेस कमिसन प्रकरणमा अडिओ टेप सार्वजनिक भएकोले मन्त्री बाँस्कोटालाई बर्खास्त गरी अनुसन्धान गर्न उनले माग गरेकी छन् ।

उनले बाँस्कोटाले तत्काल राजीनामा दिएर अनुसन्धानमा सहयोग गर्न पनि आग्रह गरेकी छन् । ‘समृद्ध नेपाल सुखी नेपालीको नारा अब समृद्ध गोकुल बाँस्कोटा, सुखी केपी ओली बनाउँदा फरक परेन । मन्त्रीको कुर्सीमा बसेर दलाली र लूटधन्दा चलाउने बास्कोटाले राजीनामा दिनुपर्छ’ उनले भनिन्, ‘अनुसन्धान प्रक्रिया अगाडि बढाउन माग गर्दछु । प्रधानमन्त्रीको निकट रहेर लूटको अपराध चलाउने छुट कसैलाई छैन । साथै सञ्चारमन्त्रीबाट भएका अरू सम्पूर्ण भ्रष्टाचारको छानवीन गर्न सरकार संग समक्ष माग गर्दछु ।’

सांसद संग्रौलाले उनको संकल्पको गहिराई र भ्रष्टाचारप्रतिको अरूचि आज छर्लङ्ग भएको बताएकी छन् ।

‘केही समय अघि सञ्चार तथा सूचना प्रविधिमन्त्री बास्कोटाले भन्नुभएको थियो, ‘भ्रष्टाचार गर्ने बानी पनि आफ्नो नपरेको र, नगर्ने संकल्प गरेको हुँदाले त्यसतर्फ आफ्नो कुनै रूचि रहेन ।’ उहाँको संकल्पको गहिराई र भ्रष्टाचारप्रतिको अरूचि आज छर्लङ्ग भएको छ’ उनले भनिन्, ‘सेक्युरिटी प्रिन्टिङ प्रेस खरिदमा स्वीस कम्पनीका लोकल एजेन्ट विजय मिश्रसँग ७० करोड रूपैयाँको डिल गरेको अडियो संवादले बास्कोटाको असली कर्म प्रष्ट भएको छ ।’

साथै उनले प्रधानमन्त्री केपी ओलीले भ्रष्टाचारीको मुख हेर्दिन भनेर दिएको अभिव्यक्तिको स्मरण गरेको बताइन् ।