काठमाण्डु- अमेरिकी राष्ट्रपति डोनाल्ड ट्रम्पले अब आफ्नो ध्यान खाडी राष्ट्रमा केन्द्रित गरेका छन् । उनले साउदी अरबलगायतका खाडी राष्ट्रहरूमा यहि महिना भ्रमणमा निस्कर्दैछन् ।

साउदी सरकारसँग निकट स्रोतको हवाला दिँदै एएफपीका अनुसार अमेरिकी राष्ट्रपति ट्रम्प यस महिनाको अन्त्यतिर साउदी अरबको रियादमा गल्फ सहयोग परिषद् (जीसीसी)का सदस्य राष्ट्रका नेताहरूसँग भेटघाट गर्ने कार्यक्रम रहेको छ ।

मे १३ देखि १६ सम्म हुने यो भ्रमणमा राष्ट्रपति ट्रम्पले साउदी अरब, कतार र संयुक्त अरब इमिरेट्सको भ्रमण गर्नेछन् । यो उनको दोस्रो कार्यकालको पहिलो आधिकारिक विदेश भ्रमण हुनेछ ।

जीसीसीमा साउदी अरब, यूएई, बहराइन, कतार, कुवेत र ओमान समावेश छन् । बैठकको उद्देश्य राजनीतिक तथा आर्थिक सहकार्यलाई सुदृढ बनाउनु रहेको जनाइएको छ ।

यात्राको पूर्वसन्ध्यामा, अमेरिकी सरकारले साउदी अरबसँग ३.५ अर्ब अमेरिकी डलर बराबरको मिसाइल बिक्री सम्झौता स्वीकृत गरेको छ ।

राष्ट्रपति ट्रम्पले साउदी अरबसँग भएका ठूला व्यापारिक सम्झौताहरूको चर्चा गर्दै आएका छन् । साउदी अरबले हालैका वर्षहरूमा रसिया–युक्रेन विषयमा अमेरिकी कूटनीतिमा सकारात्मक भूमिका निर्वाह गरेको छ ।

यो भ्रमणको समय अमेरिकाले इरानसँग वार्ता सुरु गरेको समयमा परेको छ, जसको केन्द्रबिन्दु तेहरानको आणविक कार्यक्रम हो ।

राष्ट्रपति ट्रम्पले इरानमाथि प्रतिबन्ध कडाइका साथ कार्यान्वयन गर्ने चेतावनी दिँदै अन्तर्राष्ट्रिय समुदायलाई इरानी तेल बहिष्कार गर्न आग्रह गरेका छन्।

सन् २०१८ मा पहिलाको आणविक सम्झौता तोडेका ट्रम्पले अब नयाँ सहमति कायम गर्ने आशा व्यक्त गरेका छन् । जसले क्षेत्रीय तनाव घटाउने र सम्भावित सैन्य कारबाही रोक्ने अपेक्षा गरिएको छ।

यसबाहेक, साउदी अरब र इजरायलबीच सम्भावित सम्बन्ध सुधारसम्बन्धी पहल पनि यो भ्रमणमा समावेश हुन सक्ने अनुमान गरिएको छ। यद्यपि साउदी अधिकारीहरूले गाजाको द्वन्द्व अन्त्य नभएसम्म कुनै औपचारिक सहमति सम्भव नहुने स्पष्ट पारेका छन्।