काठमाण्डु – अमेरिकारको ट्रम्प प्रशासनले लाखौं आप्रवासीहरूलाई देश निकाला गर्ने आन्तरिक गृहकार्य सुरु गरेको छ । प्रशासनले उनीहरूलाई तुरुन्तै देशबाट निष्कासनयोग्य बनाउने योजना बनाइरहेको अमेरिकी समाचार संस्था सीएनएनले जनाएको छ । यो योजना राष्ट्रपति डोनाल्ड ट्रम्पको कडाइपूर्ण आप्रवासन नीति अन्तर्गतको एउटा ठूलो कदम हो ।

यो कदम आप्रवासीहरूलाई अमेरिकामा सुरक्षा प्राप्त गर्न नदिन ट्रम्प प्रशासनले चालेका लगातार कदमहरूको पछिल्लो प्रयास हो । संघीय अधिकारीहरूलाई ऐतिहासिक रूपमा उच्च आप्रवासन पक्राउ संख्या पुर्‍याउने दबाब परिरहेको बेला, प्रशासनका अधिकारीहरूले थप व्यक्तिहरूलाई निष्कासन योग्य बनाउन आन्तरिक रूपमा काम गरिरहेका छन् ।

यस सन्दर्भमा निशाना बनाइएका व्यक्तिहरू गैरकानुनी रूपमा अमेरिका प्रवेश गरेर पछि शरणार्थीको लागि आवेदन दिएका रहेको स्रोतहरूले सीएनएनलाई बताएका छन् ।

यसपछि उनीहरूको शरणार्थी सम्बन्धी मुद्दाहरू बन्द हुने अपेक्षा गरिएको छ । यसले उनीहरूलाई देश निकालाको जोखिममा पार्नेछ । यसले लाखौं शरणार्थी आवेदकहरूलाई प्रभावित गर्न सक्छ ।

पछिल्लो दशकमा, अमेरिकी नागरिकता र आप्रवासन सेवा (यूएससीआईएस)मा शरणार्थीको लागि आवेदन दिने अधिकांश आवेदकहरूले आफूले कसरी अमेरिका प्रवेश गरे भन्ने जानकारी स्वयम् प्रदान गरेका छन् ।

तीमध्ये करिब २५ प्रतिशतले गैरकानुनी रूपमा प्रवेश गरेको बताएका थिए ।

सन् २०२३ मा शरणार्थीहरूको विश्लेषण गर्ने एक संघीय प्रतिवेदनअनुसार, यो संख्या कम्तीमा दुई लाख पचास हजार पुग्छ । बाँकी व्यक्तिहरू विभिन्न भिसाहरू मार्फत कानुनी रूपमा प्रवेश बिन्दुबाट अमेरिका प्रवेश गरेका थिए ।