काठमाण्डु – हिमाली जिल्ला मनाङमा आगामी फागुन २१ मा हुने प्रतिनिधिसभा निर्वाचनमा प्रत्यक्षतर्फ तीन जना मात्र चुनावी मैदानमा छन् ।

एक क्षेत्र मात्र रहेको मनाङमा नेपाली कांग्रेस, नेपाली कम्युनिष्ट पार्टी र मङ्गोल नेशनल अर्गनाइजेसनका उम्मेदवार मात्र निर्वाचनमा भाग लिएका छन् ।

मुख्य निर्वाचन अधिकृतको कार्यालयका अनुसार कांग्रेसको रुख, नेपाली कम्युनिष्ट पार्टीको पाँचकुने रातो तारा र मङ्गोल नेशनल अर्गनाइजेसनको भाले चुनाव चिन्हमा मात्रै मतदान हुनेछ ।

नेपाली कांग्रेससका टेकबहादुर गुरुङ, नेकपाका यशोदा सुवेदी गुरुङ र मङ्गोल नेसनल अर्गनाइजेसनका रामबहादुर गुरुङ ‘नवीन’ चुनावी मैदानमा छन्।

नेकपा (एमाले) र राष्ट्रिय प्रजातन्त्र पार्टी (राप्रपा)ले नेपाली कांग्रेसलाई समर्थन गर्दै उम्मेदवारी फिर्ता लिएपछि मैदानमा तीन जना उम्मेदवार मात्र रहेका मुख्य निर्वाचन अधिकृत रामप्रसाद पौडेलले जानकारी दिए।

‘निर्वाचनका लागि पाँच दलबाट उम्मेदवारी परेकामा दुई दलले उम्मेदवारी फिर्ता लिएपछि मतपत्रमा तीन वटा चिन्ह मात्रै रहने भएको पनि उनले बताए ।

मनाङमा कूल सात हजार मतदाता छन्। देशकै सबैभन्दा कम मतदाता रहेको यस जिल्लामा एक अस्थायीसहित २९ वटा मतदान केन्द्र निर्धारण गरिएको छ। यहाँको निर्वाचन सम्पन्न गर्न १७१ जना कर्मचारी खटाइएको छ ।