काठमाण्डु – सत्तारुढ दल नेपाल कम्युनिष्ट पार्टी (नेकपा) का सांसद तथा पूर्व सञ्चार मन्त्री गोकुल बाँस्कोटाले प्रधानमन्त्री केपी शर्मा ओलीको आलोचना गर्नेलाई पुरानै पार्टीमा फर्कन चेतावनी दिएका छन् ।

एक अनलाईनसँगको अन्तरवार्तामा बाँस्कोटाले नेकपा पार्टी प्रधानमन्त्री ओली कै कारण ठूलो पार्टी भएको उल्लेख गर्दै प्रधानमन्त्री विरुद्ध क्लव बनाएर षडयन्त्र गर्ने भए पुरानै पार्टीमा फर्कन चेतावनी दिएका हुन् ।

कसैलाई केही हुन मन लाग्यो भनेर नहुने बताउँदै उनले अहिले नेकपाको धेरै कुरा अन्तरिम भएकाले कसैले बालहठ गर्नुको अर्थ नभएको बताए ।

‘अव त अति भो कचकच । नेताहरुको तरिकाले कार्यकर्ता पनि वाक्क दिक्क भइसके । सकिन्छ मिलेर गरौँ सकिदैन भने आ–आफ्नो पहिलाको पार्टी छ त्यतै लागौँ । सधैँ गनगन नगरौँ ।’ नेता बाँस्कोटाले अहिले जे जति हल्ला भएपनि अन्त्यमा कुरा मिल्ने र पार्टीमा कुनै भूकम्प नआउने दावी समेत गरे ।

केपी ओलीकै कारणले नेकपा ठूलो पार्टी भएको र जनताले निर्वाचित गरेकाले उनले प्रधानमन्त्रीबाट राजीनामा दिनु नपर्ने र महाधिवेशनमा नजादाँसम्म पार्टीमा दुई ओटा पाईलट रहने बैधानिक व्यवस्था नै रहेको तर्क गरेका छन् ।नेकपामा अहिले गुटगत राजनीति हावी छ । एक गुटले प्रधानमन्त्री केपी शर्मा ओलीको राजिनामा माग गरेका छन् ।

प्रधानमन्त्रीको कार्यशैली र अभिब्यक्तिका कारण रुष्ट भएका नेताहरुले उनको राजिनामा मागेका हुन् । प्रधानमन्त्रीको राजिनामा माग गर्दै आएका कारण ओलीले स्थायी समिति बैठक समेत टार्दै आएका छन् भने संसद बैठक समेत स्थगत गर्ने निणर्य गरेका छन् । ओलीको यस्तो कृयाकलापले नेकपामा थप विवाद चुलिएको छ ।

नेकपाका अर्का अध्यक्ष पुष्पकमल दाहाल प्रचण्ड लगायत माधव नेपाल, झलनाथ खनाल, बामदेव गौतमले प्रधानमन्त्री र पार्टी अध्यक्षवाट राजिनामा दिनुपर्ने माग गर्दै आइरहेका छन् भने प्रधानमन्त्रीले आफुले कुनै पनि पदबाट राजीनामा नदिने अडान लिँदै आइरहेका छन् ।