काठमाण्डु – पशुपतिको मृगस्थलिबाट अस्पताल भर्ना भएका डा. गोविन्द केसीले अनसन स्थगित गरेका छन् ।

उनी वैशाख २९ गतेदेखि अनसनमा बसेका थिए । स्वास्थ्य अवस्था बिग्रिँदै गएपछि चिकित्सकको सल्लाहअनुसार उनले अनसन स्थगित गरेका छन् ।

माओवादी द्वन्द्वको क्रममा पीडित बनेकाहरूको हातबाट जुस खाएर उनले अनसन तोडेका छन् । उनलाई बुधबार साँझ महाराजगञ्जस्थित त्रिवि शिक्षण अस्पतालमा ल्याएर भर्ना गरिएको थियो ।

अस्पतालमै उनले बिहीबार अपराह्न पत्रकार सम्मेलन गरेर अनसन तोडेको बताएका छन् ।

प्रधानमन्त्री पुष्पकमल दाहाल ‘प्रचण्ड’को राजीनामासहित ४ बुँदे माग अघि सारेर डा. केसीले पशुपतिको मृगस्थलिमा २२औं अनसन थालेका थिए ।