काठमाण्डु- हिजबुल्लाहका प्रमुख नईम कासिमले लेबनानमाथि अमेरिकी नियन्त्रणलाई अस्वीकार गरेका छन् । इजरायलसँगको युद्धमा इरान समर्थित समूह कमजोर भएपछि पश्चिम निकट मानिएको नयाँ लेबनानी नेतृत्व आएको छ ।

प्रमुख कासिमले बेरुतको एक स्टेडियममा हिजबुल्लाह प्रमुख हसन नसरल्लाहको अन्त्येष्टिमा उपस्थित दशौँ हजार मानिसलाई टेलिभिजन मार्फत सम्बोधन गर्दै यस्तो बताएका हुन् ।

उनले भने, ‘हामी अत्याचारी अमेरिकाले हाम्रो देशमाथि गरेको नियन्त्रण स्वीकार गर्दैनौँ । तपाईंहरूले युद्धमा जे प्राप्त गर्न सक्नुभएन, त्यो राजनीति मार्फत प्राप्त गर्न सक्नुहुन्न ।’

कासिमले दुई महिनाको पूर्ण युद्धसहित एक वर्षभन्दा बढीको शत्रुतालाई अन्त्य गर्ने नोभेम्बरको हिजबुल्लाह–इजरायल युद्धविरामका बावजुद सशस्त्र समूह अझै बलियो रहेको र इजरायलसँग जुध्न तयार रहेको धम्की पनि दिएका छन् ।

यस महिनाको सुरुमा मध्यपूर्वका लागि अमेरिकी उप विशेष दूत मोर्गन ओर्टागसले ‘हिजबुल्लाहको आतङ्कको शासनको अन्त्य’ घोषणा गर्दै समूह ‘इजरायलद्वारा पराजित’ भएको भनेका थिए ।

लेबनानको राजनीतिमा लामो समयसम्म प्रभावशाली शक्ति रहेको हिजबुल्लाहले इजरायलसँगको युद्धमा आश्चर्यजनक क्षति बेहोरेको थियो । युद्धमा तीन दशकभन्दा बढी समय संगठनको नेतृत्वमा रहेका नसरल्लाह सेप्टेम्बरमा भएको ठूलो हवाई आक्रमणमा मृत्यु भयो ।

हिजबुल्लाहले डिसेम्बर ८ मा सिरियामा बशर अल–असदको पतनसँगै अर्को ठूलो धक्का खायो । सिरियालाई उसले लामो समयदेखि इरानबाट हतियारको लाइफलाइनको रूपमा प्रयोग गर्दै आएको थियो ।

दुई वर्षभन्दा बढीको राजनीतिक गतिरोधपछि, हिजबुल्लाह कमजोर हुँदा वासिङ्टनको रोजाइको उम्मेदवार मानिएका पूर्व सेना प्रमुख अउनलाई राष्ट्रपति र नवाफ सलामलाई प्रधानमन्त्रीको रूपमा अनुमोदन गर्न सम्भव भयो ।