काठमाण्डु – गृह मन्त्रालयले सामाजिक सञ्जालको दुरुपयोग गरी धार्मिक तथा सामाजिक विद्वेष फैलाउने गतिविधिप्रति आफ्नो गम्भीर ध्यानाकर्षण भएको जनाएको छ ।

सोमबार प्रेस विज्ञप्ति जारी गर्दै मन्त्रालयका प्रवक्ता आनन्द काफ्लेले कुनै पनि जातजाति, धर्म वा सम्प्रदाय बिचको सुसम्बन्धमा खलल पार्ने र घृणाजन्य अभिव्यक्ति दिने कार्य दण्डनीय अपराध भएको स्मरण गराएका छन् ।

पछिल्लो समय धनुषा जिल्लाका विभिन्न स्थानमा निश्चित समुदाय र धर्मलाई लक्षित गरी अमर्यादित व्यवहार प्रदर्शन गर्ने, धार्मिक स्थलमा तोडफोड, आगजनी र लुटपाट जस्ता हिंसात्मक कार्य गर्ने व्यक्ति तथा समूहलाई नियन्त्रणमा लिई कारबाहीको प्रक्रिया अगाडि बढाइएको गृहले जानकारी दिएको छ । सामाजिक मर्यादा र सार्वजनिक शान्ति सुव्यवस्थामा खलल पुर्‍याउने जोकोहीलाई पनि कानूनी दायरामा ल्याइने विज्ञप्तिमा उल्लेख छ ।

धार्मिक सहिष्णुता कायम राख्न गृहमन्त्रीको अध्यक्षतामा आईतबार र सोमबार शृंखलाबद्ध बैठकहरू सम्पन्न भएका छन् । ती बैठकहरूले तराई तथा मधेशका २१ जिल्लाका सुरक्षा समितिका पदाधिकारीहरू र विभिन्न संवैधानिक आयोगका प्रतिनिधिहरूसँग छलफल गरी संयमता र सतर्कता अपनाउन निर्देशन दिएको छ । स्थानीय प्रशासनलाई स्थितिलाई थप बिग्रन नदिन र समन्वयात्मक भूमिका खेल्न विशेष जिम्मेवारी सुम्पिएको छ ।

मन्त्रालयले मुलुकको बहुजातीय र बहुभाषिक विशेषतालाई सम्मान गर्दै नागरिकको धार्मिक स्वतन्त्रताको हकप्रति सदैव सचेत रहेको स्पष्ट पारेको छ । तर गाली बेइज्जत गर्ने, अपराध गर्न दुरुत्साहन गर्ने वा सार्वजनिक नैतिकता प्रतिकूल हुने गरी घृणा फैलाउने कार्यलाई निरुत्साहित गर्न कानून कडा रूपमा प्रस्तुत हुने प्रवक्ता काफ्लेले बताए ।

मन्त्रालयले सम्पूर्ण नागरिकलाई सामाजिक सञ्जालको जिम्मेवार प्रयोग गर्न र आपसी सद्भाव कायम राख्न अपिल समेत गरेको छ ।