काठमाण्डु – भारतसँग युद्धविराम भएको खुशयालीमा पाकिस्तानका प्रधानमन्त्री शहबाज शरीफले ‘यौम–ए–तशक्कुर’ मनाउने घोषणा गरेका छन् । भारतीय आक्रमणविरुद्ध पाकिस्तानको कारबाही र अपरेशन ‘बुनियान–उल–मर्सुस’को सफलतापछि उनले यो दिवस मनाउने घोषणा गरेका हुन्।

प्रधानमन्त्री कार्यालयको विज्ञप्तिमा भनिएको छ, ‘यो दिन अल्लाहलाई धन्यवाद दिन, सशस्त्र बललाई सम्मान गर्न र देशको एकताको कदर गर्न मनाइनेछ। शनिबार साँझ भारत र पाकिस्तानबिच युद्धविराम भएको थियो। तर तीन घण्टापछि दुवैतिरबाट युद्धविराम उल्लङ्घन गरेको आरोप एक अर्कामाथि लगाएका छन्।

पाकिस्तान र भारतले पूर्ण र तत्काल युद्धविराम लागू गर्ने निर्णयलाई अन्तर्राष्ट्रिय समुदायले स्वागत गरेको छ। २२ अप्रिलमा भारत प्रशासित कश्मीरको पहलगाममा २६ जना पर्यटकको ज्यान जानेगरी भएको भएको आक्रमणपछि दुवै देशबीच युद्ध बढेको थियो। भारतले यसको आरोप पाकिस्तानमाथि लगाए पनि पाकिस्तानले यो दाबीलाई अस्वीकार गर्दै निष्पक्ष अनुसन्धानको माग गरेको छ।

आरोपपछि भारतले गत बुधबारदेखि पाकिस्तानमा अपरेशन सिन्दूरमार्फत ड्रोन आक्रमणहरू सुरु गरेको थियो। भारतले २४ ड्रोन आक्रमण गरेको थियो।

यस घटनामा ३३ पाकिस्तानीको मृत्यु भएको छ भने ७६ जना घाइते भए। शनिबार जवाफी कारबाही गरेको पाकिस्तानले पाँच भारतीय जेट विमान खसाले र नियन्त्रण रेखाका ब्रिगेड मुख्यालय र चेकपोस्टहरू ध्वस्त पारेको दाबी गरेको छ। भारतले पाकिस्तानी सैन्य अड्डाहरूलाई निशाना बनाएको थियो।

पाकिस्तानले अपरेशन बुनियान–उल–मर्सुस नामक सैन्य कारबाहीमार्फत तत्काल जवाफ दिएको थियो। अमेरिकी राष्ट्रपति डोनाल्ड ट्रम्पको पहलमा दुई देश युद्धविरामका लागि सहमत भएका हुन्।

अमृतसरमा अझै रेड अलर्ट

भारतको अमृतसरमा युद्धविराम पछि हाललाई बिजुली पुनःस्थापित गरिएको छ, तर जिल्ला अझै पनि रेड अलर्टमा रहेको छ।

सुरक्षा अधिकारीले मानिसहरूलाई घरबाट बाहिर ननिस्कन, घरभित्रै बस्न र झ्यालबाट टाढा रहन अपील गरेका छन् । अवस्था पूर्ण रूपमा सुरक्षित भएपछि, प्रशासनले हरियो संकेत दिनेछ।