काठमाडौं – संघिय समाजवादी पार्टीका नेता एवंम् पुर्वमन्त्री इस्तियाक राईले समाजवादी पार्टी तत्काल विभाजन हुने खतरा नरहेको बताएका छन् । समाजवादी पार्टीका नेता राईले पार्टीमा विवाद रहेको स्विकार गरेपनि विभाजनको तहमै भने गइनसकेको बताए । ‘पार्टीभित्र असन्तुष्टि बढेको सत्य हो, विवाद पनि हाम्रोभित्र छ तर पार्टी विभाजनकै तहमा गएको भन्ने चांही सत्य होईन, सवै कुरा मिलेको पनि होईन ।’ पुर्वमन्त्री राईले काठमाडौंपाटीसंग भने ।

उनले पार्टी अध्यक्ष सहितका नेताहरुसंग छलफल भएको स्विकार गर्दै कतिपय विषयमा अझै सहमति नभएको स्पष्ट पारेका छन् । समाजवादी पार्टी र राजपाबीच एकताको सम्भावना छ कि छैन् भन्ने प्रश्नमा उनले राजनीतिमा असम्भव केही नभएको बताए । राजनीतिमा विवाद,एकता र टुटफुट सामान्य विषय भएका पुर्वमन्त्री राईको धारणा थियो ।

उपेन्द्र यादव र बाबुराम भट्टराईले नेतृत्व गरेको समाजवादी पार्टी फुटाउन सरकारले राजनीतिक दलसम्बन्धी र संवैधानिक परिषदसम्बन्धी दुई अध्यादेश ल्याएको चर्चा भएको थियो । प्रधानमन्त्री केपी ओली नेतृत्वको सरकारमा यसअघि शहरी विकासमन्त्री रहेका राईले समाजवादी पार्टी फुटाउन खोजेको समाचार सार्वजनिक भएको थियो । पुर्वमन्त्री राईले प्रधानमन्त्री ओलीसंग ४० प्रतिशत सांसद ल्याउने बचन दिएको स्रोतको दावी छ ।

समाजवादी पार्टीका अध्यक्ष उपेन्द्र यादवले मंगलबार विज्ञप्तिमार्फत शक्ति र पैसाको आडमा आफ्नो पार्टी विभाजन गराउन चलखेल भइरहेको आरोप लगाएका थिए । समाजवादी पार्टीभित्र तपाईहरुको बहुमत छ त भन्ने प्रश्नमा पुर्वमन्त्री राईले ४० प्रतिशत मात्र होईन आफुहरुले आवश्यक परे ६० प्रतिशत समेत जुटाउने दावी गरे ।

समाजवादी पार्टीसंग १६ सांसद छन् । राईसहित सांसदहरु रेणु यादव, विमलप्रसाद श्रीवास्तव, रुही नाज, कुलदेवी विश्वकर्मा लगायतले नयां दल दर्ताको लागि हस्ताक्षर गरिसकेको स्रोतको दावी छ । उनिहरुले नयां दल दर्ताका लागी निर्वाचन आयोगमा जाने तयारी गरेको समेत बुझिएको छ ।